Manager Online – ເວັບຂ່າວອອນລາຍສື່ດັງຂອງໄທ ລາຍງານໃນວັນທີ 5 ກໍລະກົດຜ່ານມານີ້ວ່າ ທ່ານ ຣອດນີ ມາຕິນ ອະດີດນັກຮົບເກົ່າຊາວອາເມຣິກາ ເຊິ່ງເຄີຍຜ່ານສົງຄາມຢູ່ໂຊມາລີມາກ່ອນ ແລະ ປັດຈຸບັນຜັນໂຕມາເຄື່ອນໄຫວທາງການເມືອງ ໄດ້ອອກມາເປີດເຜີຍຜ່ານສະຖານີໂທລະພາບ ເພຣສທີວີ ຂອງອີຣ່ານ ໃນທ້າຍອາທິດຜ່ານມານີ້ວ່າ ໃນຄວາມເປັນຈິງແລ້ວ ລັດຖະບານສະຫະລັດອາເມຣິກາ ພາຍໃຕ້ການນຳຂອງປະທານາທິບໍດີ ບາຣັກ ໂອບາມາ ກຳລັງກຽມສົ່ງທະຫານຮັບຈ້າງຊາວຕ່າງຊາດ ເຂົ້າໄປປະເທດຊີຣີ ເພື່ອພາລະກິດໃນການສັງຫານ ປະທານາທິບໍດີ ບາຊາ ອັນ-ອັດຊາດ ຂອງຊີຣີໂດຍສະເພາະ.
ທ່ານ ຣອດນີ ມາຕິນ ຍັງເປີດເຜີຍຕໍ່ອີກວ່າ ທີ່ຜ່ານມາລັດຖະບານໂອບາມາ ແມ່ນເປັນຜູ້ສະໜັບສະໜູນລາຍສຳຄັນຂອງກຸ່ມ IS ໂດຍເປົ້າໝາຍທີ່ແທ້ຈິງຂອງລັດຖະບານໂອບາມາ ແມ່ນໃຊ້ກຸ່ມລັດອິດສະລາມ ຫລື ກຸ່ມ IS ດຳເນີນການສ້າງຄວາມບໍ່ສະຫງົບພາຍໃນປະເທດຊີຣີ ໂດຍຫວັງໂຄ່ນລົ້ມລັດຖະບານອັດຊາດ ທີ່ມາຈາກການເລືອກຕັ້ງຂອງປະຊາຊົນຊາວຊີຣີໂດຍກົງ.
ທ່ານ ມາຕິນ ໄດ້ກ່າວວ່າ ” ທີ່ຜ່ານມາ ພວກເຮົາທັງຫລາຍຕ່າງກໍຖືກເຮັດໃຫ້ເຂົ້າໃຈຜິດມາໂດຍຕະຫລອດວ່າ ສັດຕູໝາຍເລກໜຶ່ງຂອງລັດຖະບານໂອບາມາ ຄືກຸ່ມ IS, ແຕ່ໃນຄວາມເປັນຈິງແລ້ວ ລັດຖະບານໂອບາມານີ້ລະ ທີ່ເປັນຜູ້ສະໜັບສະໜູນລາຍໃຫຍ່ຂອງກຸ່ມ IS ເພາະສະຫະລັດ ຕ້ອງການໂຄ່ນລົ້ມລະບອບການປົກຄອງຂອງອັດຊາດ ແລະ ສະຖາປະນາລັດຖະບານໃໝ່ໃນຊີຣີ ທີ່ເປັນມິດຕໍ່ຜົນປະໂຫຍດຂອງສະຫະລັດຫລາຍກ່ວາ “