ສຳນັກຂ່າວຕ່າງປະເທດ ລາຍງານໃນວັນທີ 2 ກໍລະກົດນີ້ວ່າ ທາງການເກົາຫລີໃຕ້ ໄດ້ປະກາດງົດການເກັບຄ່າທຳນຽມການຂໍວີຊ່າ ສຳລັບນັກທ່ອງທ່ຽວຈາກປະເທດຈີນ ແລະ ບາງປະເທດອາຊຽນ ເພື່ອກະຕຸ້ນການທ່ອງທ່ຽວ ຫລັງຈາກທີ່ໄດ້ປະເຊີນກັບບັນຫາການແຜ່ລະບາດຂອງພະຍາດ MERS ຢ່າງໜັກ ຈົນເຮັດໃຫ້ອຸດສາຫະກຳການທ່ອງທ່ຽວຂອງເກົາຫລີໃຕ້ ຕ້ອງພົບກັບສະພາບການຖົດຖອຍ ໂດຍມາດຕະການງົດເກັບຄ່າທຳນຽມຂໍວີຊ່າດັ່ງກ່າວນີ້ແລ້ວ ເກົາຫລີໃຕ້ຍັງອະນຸຍາດຂະຫຍາຍເວລາຈາກວີຊ່າທີ່ຂໍ ໃຫ້ສາມາດຢູ່ໃນປະເທດໄດ້ເຖິງ 90 ມື້ ຫລື 3 ເດືອນ ໃນໄລຍະລະດູການທ່ອງທ່ຽວຂອງເກົາຫລີໃຕ້ ລະຫວ່າງແຕ່ເດືອນກໍລະກົດນີ້ ໄປຈົນເຖິງເດືອນສິງຫາ.

ທັງນີ້ ຄ່າທຳນຽມການຂໍວີຊ່າເຂົ້າປະເທດເກົາຫລີໃຕ້ ແມ່ນເກັບເງິນເງິນ 15 ໂດລາຕໍ່ຄົນ ແຕ່ພາຍໃຕ້ມາດຕະການດັ່ງກ່າວນີ້ ແມ່ນຈະຖືກງົດເກັບ ນັບຕັ້ງແຕ່ວັນທີ 6 ກໍລະກົດນີ້ ໄປຈົນເຖິງວັນທີ 30 ກັນຍາ ສະເພາະນັກທ່ອງທ່ຽວທີ່ເດີນທາງມາເປັນກຸ່ມ ຈາກປະເທດຈີນ, ກຳປູເຈຍ, ອິນໂດເນເຊຍ, ຟິລິບປິນ ແລະ ຫວຽດນາມ.