ທ່ານນາງ ປານີ ຢາ​ທໍ່​ຕູ້ ກ່າວ​​ບາງ​ເນື້ອໃນ​ໂອກາດ​​ໄຂ​ກອງ​ປະຊຸມ​ ວ່າ: ກອງປະຊຸມ ຈະໄດ້ຮັບຟັງການປະກອບຄຳເຫັນຈາກບັນດາກຳມາທິການ ແລະ ຄະນະປະຈຳ ສະພາແຫ່ງຊາດ ຕໍ່ບົດລາຍງານ ຂອງລັດຖະບານ, ອົງການກວດສອບແຫ່ງລັດ, ອົງການໄອຍະການ ແລະ ສານປະຊາຊົນສູງສຸດ; ຟັງ ການປະກອບຄຳຄິດຄຳເຫັນ ຂອງຜູ້ຕາງໜ້າອົງການແນວລາວສ້າງຊາດ ແລະ ຜູ້ຕາງໜ້າອົງການຈັດຕັ້ງ ມະຫາຊົນຂັ້ນສູນກາງຕໍ່ການເຄື່ອນໄຫວ ວຽກງານຂອງ ສະພາແຫ່ງຊາດ, ຮັບຟັງການຊີ້ແຈງອະທິບາຍ ຂອງກະຊວງ, ອົງການກ່ຽວຂອງຈຳນວນໜຶ່ງຕໍ່ຂໍ້ຊັກຖາມ ຂອງ ສະມາຊິກ ສະພາແຫ່ງຊາດ ເຊິ່ງບັນດາ ເນື້ອໃນທີ່ຈະນຳມາພິຈາລະນາໃນຄັ້ງນີ້ລ້ວນແຕ່ມີຄວາມໝາຍສຳຄັນຍິ່ງ ແລະ ມີຜົນໂດຍກົງຕໍ່ຜົນສຳເລັດ ໃນການຈັດຕັ້ງປະຕິບັດ ບັນດາຄາດໝາຍ ແລະ ທິດທາງ ທີ່ກຳນົດໄວ້ ໃນແຜນພັດທະນາ ເສດຖະກິດ-ສັງຄົມ ແລະ ແຜນງົບປະມານແຫ່ງລັດ ປະຈຳສົກປີ 2015-2016 ກໍຄື ແຜນພັດທະນາເສດຖະກິດ-ສັງ ຄົມ 5 ປີ ຄັ້ງທີ VII.

ໃນ​ວາລະ​ດຳ​ເນີນ​ກອງ​ປະຊຸມ​ຄັ້ງ​ນີ້​ ຈະ​ສຸມ​ໃສ່​ຄົ້ນຄວ້າ, ພິຈາລະນາ ​ແລະ ຮັບຮອງ​ບັນຫາ​ສຳຄັນຕ່າງໆ ​ເປັນ​ຕົ້ນ ພິຈາລະນາຮັບຮອງ​ເອົາບົດລາຍງານ ຂອງ​ລັດຖະບານ ກ່ຽວກັບການຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມ, ແຜນງົບປະມານແຫ່ງລັດ, ການຈັດ​ຕັ້ງ​ປະຕິບັດ ນະໂຍບາຍເງິນຕາ ປະຈຳສົກປີ 2014-2015 ແລະ ທິດທາງແຜນການ ສົກປີ 2015-2016; ພິຈາລະນາ ຮັບຮອງ​ເອົາ ການສະເໜີແຕ່ງຕັ້ງ ສະມາຊິກລັດຖະບານໃໝ່ ຕາມການສະເໜີ ຂອງນາຍົກລັດຖະມົນຕີ; ບົດລາຍງານ ການ ເຄື່ອນໄຫວວຽກງານ ຂອງອົງການກວດສອບແຫ່ງລັດ ປະຈຳສົກປີ 2014-2015 ແລະ ທິດທາງ ແຜນການ ສົກປີ 2015-2016; ບົດລາຍງານ ການຕິດຕາມກວດກາ ຜົນການກວດສອບ ຕາມມະຕິຂອງ ສະພາແຫ່ງຊາດ; ບົດລາຍງານ ກ່ຽວກັບການເຄື່ອນໄຫວວຽກງານ ຂອງອົງການໄອຍະການປະຊາຊົນ ແລະ ສານປະຊາຊົນ ປະຈຳສົກ ປີ 2014-2015 ແລະ ທິດທາງແຜນການ ສົກປີ 2015-2016, ບົດລາຍງານການເຄື່ອນໄຫວວຽກງານ ຂອງສະພາແຫ່ງຊາດ ປະຈຳສົກປີ 2014-2015 ແລະ ທິດທາງ ແຜນການ ສົກປີ2015-2016.  ພ້ອມ​ນີ້, ຍັງຈະໄດ້ພິຈາລະນາ, ຮັບຮອງ​ເອົາ​ການ​ສ້າງ, ປັບປຸງ ​ແລະ ທາ​ບທາມກົດໝາຍ ຈຳນວນ 6 ສະບັບ, ໃນນັ້ນ ພິຈາລະນາຮັບຮອງ​ເອົາກົດໝາຍ ຈຳນວນ 3 ສະບັບຄື: ຮ່າງກົດໝາຍສ້າງໃໝ່ 2 ສະບັບ: ກົດໝາຍວ່າດ້ວຍການຕ້ານອາຊະຍາກຳ ທາງລະບົບຄອມພິວເຕີ ແລະ ກົດໝາຍວ່າ ດ້ວຍການແຂ່ງຂັນ ທາງທຸລະກິດ; ຮ່າງກົດໝາຍສະບັບປັບປຸງ1 ສະບັບ ຄື: ກົດໝາຍວ່າ ດ້ວຍການສຶກສາ ​ແລະ ທາບທາມຮ່າງ​ກົດໝາຍ ຈຳນວນ 3 ສະບັບຄື: ກົດໝາຍວ່າດ້ວຍສະພາແຫ່ງ ຊາດສະບັບປັບປຸງ, ກົດໝາຍວ່າດ້ວຍ ສະພາປະຊາຊົນທ້ອງຖິ່ນ, ກົດໝາຍວ່າ ດ້ວຍການເລືອກຕັ້ງ ສະ ມາຊິກສະພາແຫ່ງຊາດ ແລະ ສະມາຊິກ ສະພາປະຊາຊົນທ້ອງຖິ່ນ ສະບັບປັບປຸງ.