ສຳນັກຂ່າວຕ່າງປະເທດ ລາຍງານໃນວັນທີ 30 ມິຖຸນານີ້ວ່າ ທາງການຕຸນີຊີ ໄດ້ຈັບກຸມກຸ່ມຜູ້ຕ້ອງສົງໄສ ທີ່ຄາດວ່າເປັນຜູ້ລົງມືໃນເຫດກວາດຍິງກາງຊາຍຫາດ ໃນມື້ວັນສຸກອາທິດທີ່ຜ່ານມາແລ້ວ ເຮັດໃຫ້ມີຜູ້ເສຍຊີວິດ 38 ຄົນ ໃນຂະນະທີ່ຕົວແທນລັດຖະບານຂອງອັງກິດ, ເຢຍລະມັນ ແລະ ຝຣັ່ງ ໄດ້ເດີນທາງມາວາງດອກໄມ້ ເພື່ອສະແດງຄວາມໄວ້ອາໄລເຖິງຜູ້ທີ່ເສຍຊີວິດໃນຈຸດເກີດເຫດ ແລະ ໄດ້ປະກາດວ່າ ຈະປາບປາມຂະບວນການກໍ່ການຮ້າຍຢ່າງເດັດຂາດ.
ແນວໃດກໍຕາມ ທາງການຕູນິຊີ ຍັງບໍ່ທັນໄດ້ເປີດເຜີຍເຖິງລາຍລະອຽດຂອງການຈັບກຸມດັ່ງກ່າວນີ້ແຕ່ຢ່າງໃດ ໂດຍພາຍຫລັງເກີດເຫດການດັ່ງກ່າວ ແມ່ນໄດ້ສ້າງຜົນກະທົບເຖິງອຸດສາຫະກຳການທ່ອງທ່ຽວຂອງຕູນິຊີຢ່າງໜັກໜ່ວງ.