ສຳນັກຂ່າວຕ່າງປະເທດ ລາຍງານໃນວັນທີ 30 ມິຖຸນານີ້ວ່າ ເກີດອຸບັດເຫດໄຟໄໝ້ລົດໄຟຊິນຄັນເຊັນ ທີ່ກຳລັງເດີນທາງຈາກນະຄອນຫລວງໂຕກຽວ ໄປເມືອງໂອຊາກ້າ ຫັລງຈາກທີ່ມີຜູ້ໂດຍສານຄົນໜຶ່ງ ພະຍາຍາມຂ້າໂຕຕາຍດ້ວຍການເອົານ້ຳມັນຫົດຕົນຕົວ ແລ້ວຈູດໄຟເຜົາຕົນເອງ ເຊິ່ງເປັນຜົນເຮັດໃຫ້ມີຜູ້ເສຍຊີວິດຈາກເຫດການດັ່ງກ່າວ 2 ຄົນ ແລະ ມີຜູ້ທີ່ບາດເຈັບອາການສາຫັດ ຫົວໃຈຢຸດເຕັ້ນອີກ 2 ຄົນ.
ດ້ານໂຄສົກຂອງບໍລິສັດ JR Central ເຊິ່ງເປັນຜູ້ປະກອບການລົດໄຟໃຫ້ເປີດເຜີຍວ່າ ເຫດການດັ່ງກ່າວເກີດຂຶ້ນໃນເວລາປະມານ 11:30 ໂມງ ຕາມເວລາໃນທ້ອງຖິ່ນ ໃນຊ່ວງເສັ້ນທາງລະຫວ່າງສະຖານີຊິນ ໂຢໂກຮາມາ ແລະ ສະຖານີໂອດາວາຣະ ເຊິ່ງຕັ້ງຢູ່ແຂວງຄານາງາວະ.
ທັງນີ້ ຕາມລາຍງານຂ່າວໄດ້ເປີດເຜີຍວ່າ ຕົ້ນເພີງແມ່ນເກີດຂຶ້ນໃນບໍລິເວນໃກ້ກັບຫ້ອງນ້ຳ ໂດຍມີ 2 ຄົນ ມີອາການຢຸດຫາຍໃຈ ຫລັງຈາກດົມຄັວນເຂົ້າໄປຈຳນວນຫລາຍ, ພ້ອມກັນນັ້ນ ຍັງມີຜູ້ໂດຍສານທີ່ໄດ້ຮັບບາດເຈັບອີກຫລາຍຄົນ ສ່ວນຊາຍທີ່ຈູດໄຟເພື່ອຂ້າໂຕຕາຍນັ້ນ ແມ່ນເສຍຊີວິດແລ້ວ.