ສຳນັກຂ່າວຕ່າງປະເທດ ລາຍງານໃນວັນທີ 24 ມິຖຸນານີ້ວ່າ ເຈົ້າໜ້າທ່ີ ສຳນັກງານອາຫານ ແລະ ຢາຂອງຈີນ ໄດ້ຮຽກຮ້ອງໃຫ້ ບໍລິສັດຜະລິດນົມ 3 ແຫ່ງ ຢູ່ແຂວງສ່ານຊີ ທາງພາກກາງຂອງປະເທດຈີນ ຮຽກຄືນ ນົມຝຸ່ນສຳລັບເດັກນ້ອຍເກີດໃໝ່ ທ່ີບໍ່ໄດ້ມາດຕະຖານ ແລະ ຈະລົງໂທດຂັ້ນເດັດຂາດ ຖ້າກວດພົບວ່າ ມີຄວາມຜິດດ້ານກົດໝາຍ.
ທັງນີ້ ເຈົ້າໜ້າທີ່ກ່ຽວຂ້ອງຂອງຈີນ ໄດ້ກວດເຫັນສານ Nitrates ຫລາຍກ່ວາມາດຕະຖານ ໃນນົມຝຸ່ນສຳລັບເດັກນ້ອຍເກີດໃໝ່ ຈຳນວນ 5 ຊຸດ ໂດຍແມ່ນ ບໍລິສັດສ່ານຊີ ກວນຊານ,ແດຣີ (Shaanxi Guanshan Dairy) ເປັນຜູ້ຜະລິດ, ພ້ອມກັນນັ້ນ ຍັງກວດພົບສານ ເຊເລນຽມ (Selenium) 2 ຊຸດ ຊຶ່ງແມ່ນ ບໍລິສັດຊີອານ ກວນຊາ ແດຣີ (Xi’an Guanshan Dairy) ຜະລິດຈາກນົມແບ້ ເນື່ອງຈາກວ່າ ສານ Nitrates ຈະບໍ່ມີອັນຕະລາຍ ແຕ່ຈະກາຍ ເປັນພິດ ເມື່ອໄປສຳພັດ ກັບເຊື້ອແບັກທີເຣຍບາງຊະນິດ. ນອກຈາກນີ້ ທາງບໍລີສັດ ສ່ານຊີ ກວນຊານ ແດຣີ ຍັງແຈ້ງຜ່ານເວັບໄຊ ເມື່ອບໍ່ດົນມານີ້ວ່າ ຈະຮຽກຄືນ ຜະລິດຕະພັນນົມດັ່ງກ່າວ ແລະ ຈະແກ້ໄຂບັນຫາດັ່ງກ່າວ ຢ່າງຮີບດ່ວນ.