ສຳນັກຂ່າວຕ່າງປະເທດ ລາຍງານໃນວັນທີ 23 ມິຖຸນານີ້ວ່າ ຈີນຈັດພິທີເປີດເສັ້ນທາງເຊື່ອມຕໍ່ ລະຫວ່າງພື້ນທີ່ທາງພາກເໜືອຂອງປະເທດອິນເດຍ ເຂົ້າສູ່ເຂດປົກຄອງຕົນເອງຕິເບດຂອງຈີນ ໃນມື້ວັນທີ 22 ມິຖຸນາຜ່ານມານີ້ ເພື່ອອຳນວຍຄວາມສະດວກໃຫ້ແກ່ນັກສະແຫວງບຸນຊາວອິນດຽວ ທີ່ຈະເດີນທາງຂ້າມພູຫິມາໄລ ເຂົ້າໄປໃນຕິເບດ ໂດຍອາດໃຊ້ເວລາດົນປະມານ 12 ມື້ ກ່ອນທີ່ຈະເຂົ້າເຖິງພູໄກຣລາດ ແລະ ທະເລສາບສັກສິດໃນດິນແດນຕິເບດ ເຊິ່ງເປັນສະຖານທີ່ສຳຄັນທາງສາສະໜາຂອງຊາວພຸດ ແລະ ຊາວຮິນດູອີກດ້ວຍ.

ທັງນີ້ ການເປີດເສັ້ນທາງດັ່ງກ່າວນີ້ ແມ່ນມີຂຶ້ນຫລັງຈາກທີ່ ທ່ານ ສີ ຈິ້ນຜິງ ປະທານາທິບໍດີແຫ່ງ ສປ ຈີນ ໄດ້ເດີນທາງໄປຢ້ຽມຢາມອິນເດຍ ໃນປີ 2014 ຜ່ານມາ ໂດຍໄດ້ເຈລະຈາກັບ ນາຍົກລັດຖະມົນຕີອິນເດຍ ທ່ານ ນະເຣນທຣາ ໂມດີ ເພື່ອຟື້ນຟູຄວາມສຳພັນ ພ້ອມທັງແກ້ໄຂຂໍ້ຂັດແຍ່ງຕາມບໍລິເວນຊາຍແດນຮ່ວມກັນ ເຮັດໃຫ້ທັງສອງຝ່າຍ ເຫັນດີທີ່ຈະເປີດເສັ້ນທາງດັ່ງກ່າວຂຶ້ນ ເພື່ອແລກປ່ຽນດ້ານວັດທະນະທຳທາງສາສະໜາ.