ໃນຕອນບ່າຍຂອງວັນທີ 19 ມິຖຸນານີ້, ຢູ່ສະມາຄົມນັກຂ່າວແຫ່ງ ສປປ ລາວ ໄດ້ຈັດຖະແຫລງກ່ຽວກັບ ການຮັບຮອງອົງການພັດທະນາດີເດັ່ນ ເພື່ອເປັນຕົວແທນຮັບລາງວັນອາຊຽນທີ່ຈະຈັດຂຶ້ນເປັນປີທີ 2 ຢູ່ນະຄອນຫລວງວຽງຈັນໃນມໍ່ໆນີ້, ເຊິ່ງມີທ່ານ ຈິດ ທະວີໃສ ຫົວໜ້າຫ້ອງແຜນການ ແລະ ພົວພັນຕ່າງປະເທດຄະນະພັດທະນາຊົນນະບົດ ເປັນຜູ້ຖະແຫລງ ແລະ ມີບັນດາສື່ມວນຊົນເຂົ້າຮ່ວມເປັນຈຳນວນຫລາຍ.
ທ່ານ ຈິດ ທະວີໃສ ໄດ້ຖະແຫລງວ່າ: ນັບແຕ່ປີ 2013 ເປັນຕົ້ນມາຂະແໜງການພັດທະນາຊົນນະບົດ ແລະ ລຶບ ລ້າງຄວາມທຸກຍາກອາຊຽນໄດ້ຈັດໃຫ້ມີການມອບ-ຮັບລາງວັນອາຊຽນໃຫ້ແກ່ອົງການ, ສະມາຄົມຂອງບັນດາປະເທດຕ່າງໆໃນອາຊຽນ, ໂດຍມີຈຸດປະສົງເພື່ອຜັນຂະຫຍາຍກອບການພັດທະນາຊົນນະບົດ ແລະ ລຶບລ້າງຄວາມທຸກຍາກອາຊຽນປີ 2011 ຫາ ປີ 2015 ທີ່ສົ່ງເສີມການປະກອບສ່ວນຂອງທຸກພາກສ່ວນໃນສັງຄົມແນໃສ່ເຮັດໃຫ້ອາຊຽນເປັນພາກພື້ນທີ່ປາສະຈາກຄວາມທຸກຍາກປະຊາຊົນດຳລົງຊີວິດດ້ວຍຄວາມຢູ່ດີກິນດີ. ສໍາລັບ ສປປ ລາວ, ໃນຖານະເປັນຈຸດປະສານງານຂອງອາຊຽນທາງດ້ານການພັດທະນາຊົນນະບົດ ແລະ ລຶບລ້າງຄວາມທຸກຍາກ, ຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກຂັ້ນສູນກາງຫ້ອງວ່າການລັດຖະບານ ໄດ້ປະຕິບັດທິດຊີ້ນຳຄັ້ງວັນທີ 30 ມີນາ 2015 ຂອງທ່ານຮອງນາຍົກລັດຖະມົນຕີຜູ້ຊີ້ນຳວຽກງານປົກຄອງ, ໄດ້ແຕ່ງຕັ້ງໃຫ້ມີຄະນະຮັບຜິດຊອບການຄັດເລືອກຂຶ້ນ, ເພື່ອເຜີຍແຜ່ມາດຕະຖານອາຊຽນໃຫ້ບັນດາອົງການ, ກອງທຶນ, ມູນນິທິ, ສະມາຄົມ, ໜ່ວຍອົງການຈັດຕັ້ງມະຫາຊົນຢູ່ທ້ອງຖິ່ນໃຫ້ຊາບ ແລະ ສົ່ງບົດລາຍງານຜົນງານໃນການປະກອບສ່ວນເຂົ້າໃນວຽກງານພັດທະນາຊົນນະບົດ ແລະ ລຶບລ້າງຄວາທຸກຍາກເຂົ້າມາຮ່ວມຄັດເລືອກ, ເຊິ່ງໄດ້ດຳເນີນມາຕັ້ງແຕ່ເດືອນເມສາ-ເດືອນພຶດສະພາ ແລະ ມາຮອດປັດຈຸບັນຄະນະຮັບຜິດຊອບການຄັດເລືອກດັ່ງກ່າວ ໄດ້ຕົກລົງເປັນເອກະສັນກັນວ່າ: ໃຫ້ກອງທຶນຫລຸດຜ່ອນຄວາມທຸກຍາກເປັນຕົວແທນຮັບລາງວັນອາຊຽນ, ເຊິ່ງເຫັນວ່າກອງທຶນດັ່ງກ່າວ ມີມາດຕະຖານຄົບຖ້ວນ, ມີຜົນງານຕາມຄວາມຕ້ອງການທຸກປະການຄື: ໃນໄລຍະ 2 ປີຜ່ານມາ, ກອງທຶນຫລຸດຜ່ອນຄວາທຸກຍາກ ໄດ້ມີຜົນງານໃນການສ້າງພື້ນຖານໂຄງລ່າງຊົນນະບົດຂະໜາດນ້ອຍ, ຊຶ່ງລວມມີ: ຫົນທາງ, ສຸກສາລາ, ນ້ຳສະອາດ, ໂຮງຮຽນ, ຊົນລະປະທານ, ສົ່ງເສີມການຜະລິດເປັນສິນຄ້າ ແລະ ໂພຊະນາການຢູ່ 1.900 ບ້ານ ແລະ 200 ກຸ່ມບ້ານ, ຢູ່ 43 ເມືອງ ໃນ 10 ແຂວງທົ່ວປະເທດເຊິ່ງມີຜູ້ໄດ້ຮັບຜົນປະໂຫຍດເກືອບ 5 ແສນຄົນ.