ທາງການຫຼວງພະບາງປະຕິເສດ ຕໍ່ຂ່າວການໃຫ້ນັກລົງທຶນສຳປະທານ ເຂດຕາດກວາງຊີ ໂດຍລະບຸວ່າ ຍັງຢູ່ໃນໄລຍະສຶກສາຄົ້ນຄວ້າ ແລະຂຽນບົດວິພາກຢູ່
ຫຼັງຈາກທີ່ມີຂ່າວທາງສື່ອອນລາຍນ໌ ວ່າ ອຳນາດການປົກຄອງແຂວງຫຼວງພະບາງ ໄດ້ອະນຸມັດໃຫ້ບໍລິສັດ ອາໂຈກຣຸບ ສປ ຈີນ ເປັນຜູ້ສຳປະທານພັດທະນາ ເຂດຕາດກວາງຊີ ເມືອງຫຼວງພະບາງ ແຂວງຫຼວງພະບາງ ແລະມີປະຊາຊົນລາວຈຳນວນຫຼາຍ ຮຽກຮ້ອງໃຫ້ພາກສ່ວນກ່ຽວຂ້ອງ ໃຊ້ເວລາພິຈາລະນາຄັກແນ່ກ່ອນ ນັ້ນ, ຫຼ້າສຸດທາງການແຂວງຫຼວງພະບາງ ໄດ້ເຜີຍຜ່ານ ສຳນັກຂ່າວສານປະເທດລາວ ໂດຍລະບຸວ່າ: ຍັງບໍ່ໄດ້ມີການອະນຸມັດໃຫ້ບໍລິສັດ ອາໂຈກຣຸບ ສປ ຈີນເປັນຜູ້ສໍາປະທານພັດທະນາຢູ່ຂອບເຂດຕາດກວາງຊີເທື່ອ ໂດຍໄດ້ຍົກເອົາມາດຕາ 2 ໃນຂໍ້ຕົກລົງຂອງທ່ານເຈົ້າແຂວງຫຼວງພະບາງ ຂຶ້ນມາສະແດງດັ່ງນີ້:
ເນື້ອໃນມາດຕາ 2 ຂອງຂໍ້ຕົກລົງມີຄື: “ມອບໃຫ້ພະແນກແຜນການ ແລະ ການລົງທຶນແຂວງເປັນເຈົ້າການສົມທົບກັບ ພະແນກຖະແຫລງຂ່າວ ວັດທະນະທໍາ ແລະ ທ່ອງທ່ຽວ, ພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ, ເມືອງຫລວງພະບາງ ແລະ ຂະແໜງການກ່ຽວຂ້ອງເຈລະຈາ ປຶກສາຫາລື ກັບ ບໍລິສັດອາໂຈກຣຸບ ສປ.ຈີນເພື່ອເຮັດເປັນບົດບັນທຶກຄວາມເຂົ້າໃຈການສໍາປະທານລວມເຖິງການສໍາຫລວດ, ອອກແບບ ແລະ ຂຽນບົດວິພາກເສດຖະກິດເພື່ອສະເໜີໃຫ້ແຂວງອະນຸມັດແຕ່ລະກິດຈະກໍາໃນການສໍາປະທານໂດຍຮັກສາໄດ້ວັດທະນະທໍາ, ຮີດຄອງປະເພນີຂອງຊາດກໍຄືຊາວຫລວງພະບາງ ແລະ ຮັກສາໄດ້ທໍາມະຊາດສິ່ງແວດລ້ອມ”.
ສະນັ້ນ ຂັ້ນຕອນທັງໝົດຖືວ່າ: ຍັງຢູ່ຂັ້ນຕອນການປຶກສາຫາລື ແລະ ຢູ່ໃນຂະບວນການຂຽນບົດວິພາກຜົນກະທົບດ້ານຕ່າງໆ ລວມທັງຜົນໄດ້ຜົນເສຍໃນໄລຍະສັ້ນ ແລະ ໄລຍະຍາວ.
ແລະວ່າການອອກຂ່າວຂອງສື່ ອອນລາຍໃນໄລຍະທີ່ຜ່ານມາ ແມ່ນຍັງບໍ່ຊັດເຈນ, ມີການຕີຄວາມ ຫຼືປ່ຽນແປງຄວາມໝາຍໄປ ຕ່າງໆນານາ (ຂ່າວສານປະເທດລາວກ່າວ).
