ສຳນັກຂ່າວຕ່າງປະເທດ ລາຍງານໃນວັນທີ 19 ມິຖຸນານີ້ວ່າ ເຈົ້າໜ້າທີ່ຕຳຫລວດເມືອງຊານສະຕັນ ລັດເຊົ້າແຄໂຣໄລນາ ສະຫະລັດອາເມຣິກາ ສາມາດຈັບກຸມຕົວຜູ້ກໍ່ເຫດກວາດຍິງສັງຫານໝູ່ຊາວອາເມຣິກັນຜິວດຳ ຈຳນວນ 9 ຄົນ ທີ່ໂບດແຫ່ງໜຶ່ງໃຈກາງເມືອງ ໂດຍຜູ້ກ່ຽວໄດ້ກໍ່ເຫດໃນມື້ວັນທີ 17 ມິຖຸນາທີ່ຜ່ານມາ ຄົນຮ້າຍຊື່ວ່າ ທ້າວ ດີແລນ ຣູບ ອາຍຸ 21 ປີ ໂດຍເຂົາໄດ້ເຂົ້າໄປລີ້ຢູ່ໃນຫ້ອງອ່ານພະຄຳພີປະມານ 1 ຊົ່ວໂມງ ກ່ອນທີ່ຈະເປີດສາກຍິງໃສ່ຊາວຜິວດຳຢູ່ໃນໂບດ ແຕ່ເຂົາກໍໄດ້ໄວ້ຊີວິດຜູ້ຍິງຄົນໜຶ່ງ ເພື່ອຕ້ອງການໃຫ້ນາງໄປເລົ່າເຖິງວີລະກຳຂອງເຂົາໃນເທື່ອນີ້.
ແຫລ່ງຂ່າວໄດ້ລະບຸວ່າ ທ້າວ ດີແລນ ຫາກໍໄດ້ຮັບປືນເປັນຂອງຂວັນວັນເກີດຈາກພໍ່ຂອງເຂົາ ໃນເດືອນເມສາທີ່ຜ່ານມານີ້ ສ່ວນສິ່ງທີ່ຈູງໃຈພາໃຫ້ກໍ່ເຫດ ເຈົ້າໜ້າທີ່ຕຳຫລວດໄດ້ຕັ້ງປະເດັນ ເປັນການກຽດຊັງເຊື້ອຊາດ ແລະ ສີຜິວຢ່າງຮຸນແຮງ.