ສຳນັກຂ່າວຂອງໄທຫລາຍສຳນັກໄດ້ລາຍງານ ໃນວັນທີ 18 ມິຖຸນາຜ່ານມານີ້ວ່າ ກົມຄວບຄຸມພະຍາດ ກະຊວງສາທາລະນະສຸກຂອງໄທ ໄດ້ຖະແຫລງພົບຜູ້ຕິດເຊື້ອໄວຣັດເມີສ (MERS) ຄົນທຳອິດໃນປະເທດໄທແລ້ວ ໂດຍເປັນຄົນຊາວໂອມານ ອາຍຸ 75 ປີ ທີ່ຕິດເຊື້ອມາຈາກຕ່າງປະເທດ ແລະ ໄດ້ເດີນທາງເຂົ້າມາປະເທດໄທ ເມື່ອວັນທີ 15 ມິຖຸນາຜ່ານມາ ພາຍຫລັງຜູ້ກ່ຽວເກີດອາການປວດເມື່ອຍ ຈິ່ງໄດ້ເຂົ້າກວດຢູ່ໂຮງໝໍທີ່ບາງກອກ ໂດຍຜົນກວດໄດ້ອອກມາເປັນບວກ.
ທັງນີ້ ຜູ້ຕິດເຊື້ອລາຍດັ່ງກ່າວ ພາຍຫລັງເດີນທາງເຂົ້າມາປະເທດໄທ ແມ່ນໄດ້ໄປພັກຢູ່ໂຮງແຮມເຂດສຸຂຸມວິດ ຮ່ອມ 3 ກ່ອນທີ່ຈະເຂົ້າມາປິ່ນປົວຢູ່ໂຮງໝໍ ເຊິ່ງປັດຈຸບັນເຈົ້າໜ້າທີ່ຂອງໄທ ກຳລັງເລັ່ງຄົ້ນຫາ ແລະ ຄັກແຍກຜູ້ທີ່ໄດ້ສຳພັດກັບເຊື້ອພະຍາດໃນເຂດຊຸມຊົນດັ່ງກ່າວແລ້ວ ໂດຍຄາດວ່າຈະມີຄົນປະມານ 59 ຄົນ ທີ່ເປັນຜູ້ໃກ້ຊິດທີ່ຕ້ອງໄດ້ຈັບຕາເຝົ້າລະວັງ.