ວັນທີ 18 ມິຖຸນາ 2015 ທີ່ສະພາແຫ່ງຊາດ ທ່ານ ດຣ. ບຸນຈັນ ສິນທະວົງ ລັດຖະມົນຕີວ່າການກະຊວງໂຍທາທິການ ແລະ ຂົນສົ່ງ ໄດ້ຕອບຂໍ້ຂ້ອງໃຈທີ່ປະຊາຊົນ ໄດ້ໂທເຂົ້າມາທາງສາຍດ່ວນສະພາ ໃນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ VII ກ່ຽວກັບໂຄງການກໍ່ສ້າງເສັ້ນທາງແຕ່ບ້ານດອນໜູນໄປຫາທ່າງ່ອນ ເມືອງໄຊທານີ ນະຄອນຫຼວງວຽງຈັນ ທີ່ປະຊາຊົນໄດ້ຮັບຜົນກະທົບຕໍ່ບັນຫາຂີ້ຝຸ່ນວ່າ: ໂຄງການກໍ່ສ້າງເສັ້ນທາງດັ່ງກ່າວ ເປັນໂຄງການບຸລິມະສິດ ແລະ ນອນໃນແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VII ຂອງລັດຖະບານວາງອອກ ເປັນທາງຫຼວງແຫ່ງຊາດ ທີ່ເຊື່ອມຕໍ່ລະຫວ່າງແຂວງຕໍ່ແຂວງ ໂດຍຜ່ານມາ ສະພາບເສັ້ນທາງດັ່ງກ່າວ ເປັນເສັ້ນທາງປູຢາງໜ້າທາງແຄບ ບາງຈຸດເປ່ເພ ເປັນຂຸມ ແຕກແຫງ ອັນໄດ້ເຮັດໃຫ້ການສັນຈອນໄປມາພົບຄວາມຫຍຸ້ງຍາກ ມັກເກີດອຸບັດຕິເຫດ ເພື່ອຍົກລະດັບເສັ້ນທາງດັ່ງກ່າວ ໃຫ້ໄດ້ມາດຕະຖານຄົບຊຸດ ຕອບສະໜອງຄວາມຮຽກຮ້ອງຕ້ອງການຂອງປະຊາຊົນທີ່ນຳໃຊ້ ພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນ ຈຶ່ງໄດ້ຄົ້ນຄວ້າວາງແຜນສະເໜີຂັ້ນເທິງພິຈາລະນາ ການກໍ່ສ້າງເສັ້ນທາງດັ່ງກ່າວ ທີ່ມີຄວາມຍາວ 12 ກິໂລແມັດ ກວ້າງ 25,5 ແມັດ ໜ້າທາງລົດແລ່ນ 19 ແມັດ ປູດ້ວຍເບຕົງເສີມເຫຼັກ ມີຮ່ອງລະບາຍນ້ຳທາງຄົນຍ່າງ ດອນກາງທາງ ໄຟເຍືອງທາງ ລວມມູນຄ່າ 59,95 ລ້ານໂດລາສະຫະລັດ ຫຼື ປະມານ 480 ຕື້ກີບ ມາຮອດປັດຈຸບັນ ສາມາດປະຕິບັດໄດ້ 32% ຂອງແຜນການ ຖືວ່າມີຄວາມຄືບໜ້າ ປັດຈຸບັນກຳລັງສຸມໃສ່ເທເບຕົງໜ້າທາງ ແລະ ຕາມແຜນການທີ່ວາງໄວ້ຄາດວ່າປີ 2016 ຈະໃຫ້ສຳເລັດ 100%.
ຕໍ່ກັບຫາງສຽງຂອງສັງຄົມຈົ່ມວ່າ ໃນໄລຍະກໍ່ສ້າງເສັ້ນທາງມີຂີ້ຝຸ່ນຫຼາຍ ຜ່ານມາຜູ້ຮັບເໝົາກໍ່ໄດ້ຫົດນ້ຳ ຖົມຂຸມໜ້າທາງເປັນປົກກະຕິ ແຕ່ຍ້ອນວ່າເສັ້ນທາງດັ່ງກ່າວ ເປັນເສັ້ນທາງທີ່ມີການສັນຈອນຢ່າງຫຼວງຫຼາຍ ຈຶ່ງເຮັດໃຫ້ການຫົດນ້ຳບໍ່ພຽງພໍ ເກີດມີຂຸມ ແລະ ມີຂີ້ຝຸ່ນ ເຊິ່ງທາງກະຊວງ ຈຶ່ງໄດ້ຊຸກຍູ້ໃຫ້ພະແນກ ຍທຂ ນວ ໃນນາມເຈົ້າຂອງໂຄງການ ພະຍາຍາມຊຸກຍູ້ໃຫ້ຜູ້ຮັບເໝົາ ເອົາໃຈໃສ່ເພີ່ມທະວີການຫົດນ້ຳໃຫ້ຫຼາຍຂຶ້ນກວ່າເກົ່າ ພ້ອມທັງເພີ່ມທະວີກ່ຽວກັບປ້າຍສັນຍານຕ່າງໆ ເພື່ອຫຼີກລ່ຽງການເກີດອຸບັດຕິເຫດຕາມມາ ແລະ ເມື່ອໂຄງການກໍ່ສ້າງສຳເລັດ ກໍ່ຈະເຮັດໃຫ້ການເດີນທາງສະດວກສະບາຍຢ່າງແນ່ນອນ ແຕ່ໄລຍະທີ່ກຳລັງກໍ່ສ້າງນີ້ ປະຊາຊົນທີ່ຊົມໃຊ້ເສັ້ນທາງ ແລະ ປະຊາຊົນທີ່ອາໄສຢູ່ຕາມສອງຟາກ ທາງນັ້ນໃຫ້ພະຍາຍາມອົດທົນ ໃຫ້ການຮ່ວມມື ໃຫ້ຄວາມສະດວກ ແລະ ຖ້າເປັນໄປໄດ້ ກໍ່ໃຫ້ນຳໃຊ້ເສັ້ນທາງອື່ນໆກ່ອນ ທາງບໍ່ທັນສຳເລັດໃຫ້ມີການລະມັດລະວັງໃນການສັນຈອນ ຄ່ອຍໄປ ຄ່ອຍມາແດ່ ເພື່ອຄວາມປອດໄພໄວ້ກ່ອນ.
ແຫລ່ງຂ່າວ: ວຽງຈັນໃໝ່