ໃນຕອນເຊົ້າຂອງວັນທີ 18 ມິຖຸນານີ້, ທ່ານ ດຣ. ບຸນຈັນ ສິນທະວົງ ລັດຖະມົນ ຕີວ່າການກະຊວງໂຍທາທິການ ແລະ ຂົນສົ່ງ ໄດ້ອອກມາຊີ້ແຈງຕອບຂໍ້ຂ້ອງໃຈຂອງປະຊາຊົນບ້ານໂພນສະອາດ, ເມືອງໄຊເສດຖາ ນະຄອນຫລວງວຽງຈັນ ກ່ຽວກັບການສະເໜີໃຫ້ພາກສ່ວນກ່ຽວຂ້ອງລົງກວດກາບໍລິສັດ ຫລົງຝູ ທີ່ສ້າງເປັນຕຶກ 3 ຊັ້ນ (ຕໍ່ໜ້າປໍ້ານ້ຳມັນໂພນສະອາດ), ເຊິ່ງການກໍ່ສ້າງແມ່ນໄດ້ກວມເອົາຄອງນ້ຳ ແລະ ເສັ້ນທາງລຽບຕາມຄອງນ້ຳທີ່ປະຊາຊົນເຄີຍທຽວໄປມາ. ຕໍ່ບັນຫາດັ່ງກ່າວ ກະຊວງໂຍທາທິການ ແລະ ຂົນສົ່ງ ກໍຄືກົມເຄຫາຜັງເມືອງ ໄດ້ສົມທົບກັບພາກສ່ວນກ່ຽວຂ້ອງເພື່ອລົງໄປເກັບກຳຂໍ້ມູນຕົວຈິງ ແລະ ເຫັນວ່າ: ບໍລິສັດ ຫລົງຝູ ລົງທຶນ ຈຳກັດ ໄດ້ລະເມີດລະບຽບການຂອງຜັງເມືອງແທ້, ເຊິ່ງໄດ້ມີການກໍ່ສ້າງກວມເອົາເຂດຮ່ອງນ້ຳຮ່ອງໄກ່ແກ້ວ ແລະ ເສັ້ນທາງແຄມຮ່ອງ 2 ເບື້ອງ, ເຊິ່ງເປັນເຂດຫວງຫ້າມ, ບໍ່ໃຫ້ມີການປຸກສ້າງໃດໆ. ມາຮອດປັດຈຸບັນທາງພະແນກໂຍທາທິການ ແລະ ຂົນສົ່ງ ນະຄອນຫລວງວຽງຈັນ ຈຶ່ງໄດ້ສັ່ງໂຈະໂຄງການດັ່ງກ່າວຊົ່ວຄາວ ແລະ ໃຫ້ເປີດເສັ້ນ ທາງແຄມຮ່ອງ 2 ເບື້ອງ ເພື່ອໃຫ້ປະຊາຊົນ ໄດ້ສັນຈອນເຂົ້າ-ອອກເປັນປົກກະຕິ, ພ້ອມທັງແກ້ໄຂບັນຫາຕ່າງໆທີ່ເກີດຂຶ້ນຕາມລະບຽບກົດໝາຍທີ່ມີແລ້ວຢ່າງເຂັ້ມງວດຄື: ກົດໝາຍວ່າດ້ວຍຜັງເມືອງ, ກົດໝາຍວ່າດ້ວຍການກໍ່ສ້າງ ແລະ ກົດລະບຽບວ່າດ້ວຍການຄຸ້ມຄອງການປຸກສ້າງ ສະບັບເລກທີ 621/ກຄຜ, ລົງວັນທີ 11 ພະຈິກ 2013. ນອກຈາກນີ້ ຍັງໄດ້ເຮັດບົດບັນທຶກກັບບໍລິສັດດັ່ງກ່າວ ເພື່ອແກ້ໄຂສະເພາະໜ້າ, ໂດຍສະເພາະລະດູຝົນທີ່ຈະມາເຖິງນີ້, ບໍ່ໃຫ້ຮ່ອງນ້ຳດັ່ງກ່າວຖືກອັດຕັນ ແລະ ເກີດສະພາບນ້ຳຖ້ວມຂັງສົ່ງຜົນກະທົບຕໍ່ເຮືອນຊານປະຊາຊົນໃນບໍລິເວນໃກ້ຄຽງໄດ້ອີກ.
ແຫລ່ງຂ່າວ: ລາວພັດທະນາ