CC ກັບ BB ຕ່າງກັນແນວໃດ? ມາຮຽນຮູ້ຄວາມແຕກຕ່າງລະຫວ່າງບີບີຄີມແລະຊີຊີຄີມ ແລ້ວມາເລືອກສິ່ງທີ່ໃຊ້ສຳລັບຜິວຂອງທ່ານກັນ
ແຕ່ກ່ອນຖ້າເວົ້າເຖິງເລື່ອງການແຕ່ງໜ້າໃຜໆກໍມັກຈະນິຍົມໃຊ້ຮອງພື້ນສຳລັບປົກປິດຣິ້ວຮອຍໃຫ້ໃບໜ້າລຽບນຽນແຕ່ຖ້າເປັນທຸກມື້ນີ້ ບອກເລີຍວ່າມີຜະລິດຕະພັນຕ່າງໆຫລວງຫລາຍອອກມາເອົາໃຈເຈົ້າສາວໆກັນຫລາຍທີ່ສຳຄັນສາມາດໃຊ້ແທນຮອງພື້ນໄດ້ເປັນຢ່າງດີແຖມຍັງມີຄຸນສົມບັດກັນແດດແລະປົກປິດໄດ້ລຽບນຽນຫລາຍຂຶ້ນ ໂດຍຜະລິດຕະພັນທີ່ວ່ານີ້ກໍຄື “ບີບີຄີມ” ແລະ “ຊີຊີຄີມ” ແຕ່ສາວໆສ່ວນໃຫຍ່ກໍຍັງຄົງສັບສົນວ່າບີບີຄີມ ແລະ ຊີຊີຄີມນັ້ນຄືຫຍັງ ແລະແຕກຕ່າງກັນແນວໃດ ມື້ນີ້ລາໂພສມີຂໍ້ມູນມາໃຫ້ສາວໆໄດ້ສຶກສາກັນເພື່ອໃຜທີ່ກຳລັງຄິດຈະຊື້ບີບີຄີມຫລືຊີຊີຄີມມາໃຊ້ແທນຮອງພື້ນ ຈະໄດ້ເລືອກໃຊ້ໄດ້ຖືກກັບສະພາບຜິວຂອງຕົວເອງ
– ບີບີຄີມ (BB Cream) ຄຸນສົມບັດເດັ່ນ ປ້ອງກັນແສງແດດ ແລະ ປົກປິດຜິວຈາກຮອຍເມັນ, ຝ້າ,ສິວ ແລະ ຈຸດດ່າງດຳຕ່າງໆເທິງໃບໜ້າໄດ້ນຽນ
ບີບີຄີມເປັນຄີມທີ່ສາວໆນິຍົມໃຊ້ກັນມາເປັນໄລຍະເວລາດົນແລ້ວ ແລະ ຖືກຜະລິດຂຶ້ນມາກ່ອນຊີຊີຄີມ ໂດຍບີບີຄີມຈະມີຄຸນສົມບັດຄ້າຍໆກັບຮອງພື້ນທີ່ສາວໆໃຊ້ກັນຢູ່ທົ່ວໄປແຕ່ທັງນີ້ບີບີຄີມຈະມີເນື້ອທີ່ບາງເບົາກວ່າ ປົກປ້ອງຜິວຈາກແດດໄດ້ດີກວ່າ ນອກຈາກນີ້ຍັງໂດດເດັ່ນໃນເລື່ອງຂອງການປົກປິດຮອຍສິວແລະຮອຍເມັນ,ຮອຍຝ້າທັງຫລາຍໄດ້ຢ່າງນຽນໃສ ແຕ່ທັງນີ້ບີບີຄີມກໍຍັງຄົງມີບັນຫາໃນເລື່ອງຂອງການມີເສດສີໃຫ້ເລືອກໃຊ້ແລ້ວເຮັດໃຫ້ສີຜິວປ່ຽນລະຫວ່າງມື້ອັນເປັນສາເຫດເຮັດໃຫ້ບາງຄົນໃບໜ້າໝອງຄ້ຳຂຶ້ນນັ້ນເອງ
– ຊີຊີຄີມ (CC Cream) ຄຸນສົມບັດເດັ່ນ ປ້ອງກັນແດດປັບລະດັບສີຜິວໃຫ້ສະຫວ່າງຂາວແລະລຽບນຽນຂຶ້ນ
ສຳລັບ ຊີຊີຄີມ ນີ້ເປັນຄີມທີ່ພັດທະນາມາຈາກ ບີບີຄີມ ມີຄຸນສົມບັດຄ້າຍ ກັບບີບີຄີມ ແຕ່ສິ່ງທີ່ເຮັດໃຫ້ ຊີຊີຄີມ ແຕກຕ່າງຈາກ ບີບີຄີມ ກໍຄືການເພີ່ມຄຸນສົມບັດຂອງການຄວບຄຸມສີຜິວແລະປັບສະພາບສີຜິວໃຫ້ຂາວນຽນແລະສະຫວ່າງໃສຂຶ້ນຢ່າງເປັນທຳມະຊາດທີ່ສຳຄັນຍັງສາມາດໃຊ້ໄດ້ທຸກເສດສີຜິວແລະບໍ່ເຮັດໃຫ້ສີຜິວປ່ຽນລະຫວ່າງມື້ ເອີ້ນໄດ້ວ່າເປັນຕົວເຕີມເຕັມຈຸດບົກຜ່ອງຂອງ ບີບີຄີມ ເລີຍກໍວ່າໄດ້ແຕ່ທັງນີ້ໃນເລື່ອງຂອງການປົກປິດ ຊີຊີຄີມຈະປົກປິດໄດ້ໃນລະດັບທີ່ບາງເບົາກວ່າ
ໂດຍສະຫລຸບແລ້ວກໍຄື ຫາກໃຜທີ່ຢາກຈະປົກປິດຮອຍສິວ,ເມັນ, ຝ້າໃຫ້ລຽບນຽນກໍໃຫ້ເລືອກໃຊ້ ບີບີຄີມ ແຕ່ສຳລັບໃຜທີ່ບໍ່ໄດ້ມີບັນຫາຮອຍສິວເທົ່າໃດແຕ່ຢາກຈະໃຫ້ໜ້າເບິ່ງຜ່ອງແລະຂາວນຽນແບບທຳມະຊາດກໍໃຫ້ເລືອກໃຊ້ ຊີຊີຄີມ ແທນ ແລະ ນີ້ກໍຄືຄວາມແຕກຕ່າງລະຫວ່າງ 2 ສິ່ງນີ້ ສາວໆຄົງຈະເລືອກໃຊ້ໃຫ້ເໝາະກັບຜິວຂອງເຈົ້າກັນໄດ້