ສຳນັກຂ່າວຕ່າງປະເທດ ລາຍງານໃນວັນທີ 18 ມິຖຸນານີ້ວ່າ ເກີດເຫດໄຟໄໝ້ເຮືອບິນໂດຍສານ ໂບອິ້ງ 737-300 ຖ້ຽວບິນ DV-742 ຂອງສາຍການບິນ SCAT Airlines ໃນມື້ວັນທີ 16 ມິຖຸນາຜ່ານມາ ທີ່ສະໜາມບິນອັກເທົາ ປະເທດກາຊັກສະຖານ ໂດຍເຮືອບິນລຳດັ່ງກ່າວນີ້ ຫາກໍລົງຈອດທີ່ສະໜາມບິນດັ່ງກ່າວໄດ້ບໍ່ດົນ ເພື່ອລໍຖ້າຮັບຜູ້ໂດຍສານ ແລະ ໃນຂະນະທີ່ເຈົ້າໜ້າທີ່ກຳລັງກວດກາສະພາບເຮືອບິນຢູ່ນັ້ນ ຖັງອົກຊີເຢັນຂອງເຮືອບິນກໍໄດ້ລະເບີດຂຶ້ນ ໃນບໍລິເວນບ່ອນມ້ຽນເຄື່ອງທາງດ້ານໜ້າ ແລ້ວເກີດໄຟໄໝ້ລຸກຖ້ວມຢ່າງກະທັນຫັນ ພຽງບໍ່ດົນກ່ອນທີ່ເຮືອບິນດັ່ງກ່າວຈະຂຶ້ນບິນ ອັນໄດ້ສ້າງຄວາມແຕກຕື່ນ ຢ້ານກົວໃຫ້ແກ່ຜູ້ຄົນໃນທົ່ວສະໜາມບິນ.
ຢ່າງໃດກໍຕາມ ໂຊກດີທີ່ບໍ່ທັນມີຜູ້ໂດຍສານຂຶ້ນໄປເທິງເຮືອບິນເທື່ອ ເຮັດໃຫ້ບໍ່ມີຜູ້ໄດ້ຮັບບາດເຈັບ ຫລື ເສຍຊີວິດຈາກເຫດການທີ່ເກີດຂຶ້ນ ໃນຂະນະທີ່ເຈົ້າໜ້າທີ່ດັບເພີງຂອງສະໜາມບິນ ກໍໄດ້ເຂົ້າມາຄວບຄຸມໄຟໄວ້ໄດ້ ດ້ວຍເຄື່ອງສີດນ້ຳຂະໜາດໃຫຍ່.
