ກອງປະຊຸມເປີດກວ້າງຂອງອົງຄະນະພັກກະຊວງການເງິນໄດ້ໄຂ ຂຶ້ນໃນລະຫວ່າງ ວັນທີ 17-18 ມິຖຸນານີ້, ໂດຍການເປັນປະທານຂອງສະຫາຍ ດຣ ລຽນ ທີແກ້ວ ກຳມະການສູນກາງ, ເລຂາຄະນະພັກ, ລັດຖະມົນຕີວ່າ ການກະຊວງການເງິນ, ມີບັນດາສະຫາຍຄະນະພັກຮາກຖານກະຊວງດັ່ງກ່າວເຂົ້າຮ່ວມຢ່າງພ້ອມພຽງ.

ກອງປະຊຸມໄດ້ປຶກສາຫາລືກ່ຽວກັບການກະກຽມບົດສະຫລຸບຕີລາຄາ ວຽກງານຮອບດ້ານ 6 ເດືອນຜ່ານມາ, ການຈັດຕັ້ງປະຕິບັດແຜນງົບປະມານ 6 ເດືອນຕົ້ນປີ, ມາດຕະການ 6 ເດືອນທ້າຍປີ ແລະ ທິດທາງ, ຄາດໝາຍ, ໜ້າທີ່ແຜນງານງົບປະມານສົກປີ 2015 – 2016, ນອກຈາກນີ້, ກໍກະກຽມເນື້ອໃນບົດການສຳຫລວດນຳພາ ຂອງຄະນະພັກກະຊວງ ແລະ ບົດລາຍງານການເມືອງຕໍ່ກອງ ປະຊຸມໃຫຍ່ອົງຄະນະພັກກະຊວງການເງິນຄັ້ງທີ II ທີ່ຈະມີຂຶ້ນໃນບໍ່ດົນນີ້.

ສະຫາຍເລຂາຄະນະພັກ, ລັດຖະມົນຕີວ່າການກະຊວງການເງິນ ໃຫ້ຮູ້ວ່າ: ມະຕິຂອງກອງປະຊຸມຄັ້ງນີ້ຈະເປັນພື້ນ ຖານສຳຄັນເພື່ອເຮັດໃຫ້ການກະກຽມດຳເນີນກອງໃຫຍ່ອົງຄະນະພັກກະຊວງການເງິນຄັ້ງທີ II ມີເນື້ອໃນເລິກເຊິ່ງ, ສາມາດບັນລຸໄດ້ຕາມຈຸດປະສົງ ແລະ ລະດັບຄາດໝາຍວາງໄວ້, ທັງເປັນການສຸມໃສ່ຈັດຕັ້ງປະຕິບັດແຜນລາຍ ຮັບ- ລາຍຈ່າຍງົບປະມານແຫ່ງລັດສົກປີ 2014-2015 ໃຫ້ບັນລຸຕາມແຜນກຳນົດໄວ້.

ແຫລ່ງຂ່າວ: ລາວພັດທະນາ