ກອງປະຊຸມແລກປ່ຽນ ແລະ ຖອດຖອນບົດຮຽນວຽກງານຄວບຄຸມ ແລະ ຕອບໂຕ້ພະຍາດໄຂ້ຍຸງລາຍໃນຂົງເຂດອາຊຽນ ໄດ້ຈັດຂຶ້ນວັນທີ 15 ມິຖຸນາ 2015 ທີ່ໂຮງແຮມລາວພລາຊາ ນະຄອນຫຼວງວຽງຈັນ ໂດຍເປັນປະທານຂອງທ່ານ ສຈ.ດຣ. ເອກສະຫວ່າງ ວົງວິຈິດ ລັດຖະມົນຕີວ່າການກະຊວງສາທາລະນະສຸກ ມີທ່ານ ສາຍທອງ ແກ້ວດວງດີ ຮອງເຈົ້າຄອງ ນະຄອນຫຼວງວຽງຈັນ ພ້ອມດ້ວຍຜູ້ຕາງໜ້າກອງເລຂາອາຊຽນ ບັນດາປະເທດສະມາຊິກອາຊຽນ ແລະ ຄູ່ຮ່ວມ ຫົວໜ້າກົມ ຫົວໜ້າພະແນກ ແລະ ພະນັກງານຈາກພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານລັດຖະມົນຕີວ່າການກະຊວງສາທາລະນະສຸກ ໄດ້ກ່າວວ່າ: ສປປ ລາວ ໄດ້ຮັບກຽດເປັນເຈົ້າພາບສະເຫຼີມສະຫຼອງ ວັນໄຂ້ຍຸງອາຊຽນ ຄັ້ງທີ 5 ປະຈຳປີ 2015 ເຊິ່ງໃນວັນທີ 15 ມິຖຸນາຂອງທຸກປີ ບັນດາປະເທດສະມາຊິກອາຊຽນ ຈະໝູນວຽນກັນເປັນເຈົ້າພາບ ໂດຍກອງປະຊຸມຖອດຖອນບົດຮຽນການຄວບຄຸມພະຍາດໄຂ້ຍຸງລາຍ ໃນຂົງເຂດອາຊຽນໃນຄັ້ງນີ້ ແມ່ນກິດຈະກຳໜຶ່ງທີ່ນອນຢູ່ໃນການສະເຫຼີມສະຫຼອງວັນດັ່ງກ່າວ ໂດຍຖືໂອກາດນີ້ເຕົ້າໂຮມບັນດາປະເທດອາຊຽນ ໃນການປຸ້ມລຸມສາມັກຄີຮ່ວມກັນແກ້ໄຂບັນຫາໄຂ້ຍຸງລາຍ ເພາະບັນຫາໄຂ້ຍຸງລາຍໄດ້ ກາຍເປັນບັນຫາຂົງເຂດພາກພື້ນ ແລະ ທົ່ວໂລກ ມີແຕ່ການຮ່ວມມືກັນຢ່າງໃກ້ຊິດເທົ່ານັ້ນ ພ້ອມທັງການແລກປ່ຽນປະສົບການວິຊາສະເພາະຕ່າງໆເທົ່ານັ້ນ ຈຶ່ງຈະປອດຈາກການເປັນພະຍາດໄຂ້ຍຸງລາຍ ບໍ່ໃຫ້ເກີດການລະບາດໃຫຍ່ຂຶ້ນ.
ການຄວບຄຸມໜອນນ້ຳຍຸງລາຍ ທຸກພາກສ່ວນຕ້ອງຮ່ວມແຮງຮ່ວມໃຈກັນ ເອົາໃຈໃສ່ຕໍ່ວຽກງານດັ່ງກ່າວ ກາຍເປັນວຽກຂອງອຳນາດການປົກຄອງ ແລະ ຂັ້ນນຳທຸກພາກສ່ວນໃນສັງຄົມ ພ້ອມທັງເປັນວຽກຂອງແຕ່ລະຄອບຄົວ ເປັນນິໄສຂອງທຸກຄົນ ບໍ່ວ່າທັງພາກລັດ ແລະ ເອກະຊົນ ຕາມສະຖານທີ່ສາທາລະນະຕ່າງໆ ໄດ້ມີການເອົາໃຈໃສ່ໃນການຄວບຄຸມທຳລາຍ ແຫຼ່ງເພາະພັນໜອນນ້ຳຍຸງລາຍ ພາຍໃຕ້ຄຳຂວັນທີ່ວ່າ “ຄອບຄົວເປັນເຈົ້າການ ບໍ່ມີໜອນນ້ຳຍຸງລາຍ ບໍ່ມີໄຂ້ຍຸງ” ເຊິ່ງເປັນຄຳຂວັນໃນການສະເຫຼີມສະຫຼອງວັນດັ່ງກ່າວ ທີ່ລາວເປັນເຈົ້າພາບໃນປີນີ້.
ການຈັດສະເຫຼີມສະຫຼອງວັນດັ່ງກ່າວຂຶ້ນ ໃນແຕ່ລະປີນັ້ນ ກໍ່ເພື່ອແນໃສ່ປຸກລະດົມໃຫ້ຊຸມຊົນ ແລະ ບັນດາອົງການຈັດຕັ້ງຕ່າງໆຂອງແຕ່ລະປະເທດ ເອົາໃຈໃສ່ແກ້ໄຂວຽກງານໄຂ້ຍຸງລາຍ ເຊິ່ງລາວໄດ້ວາງຍຸດທະສາດໃນການຕ້ານໄຂ້ຍຸງລາຍ ໂດຍໄດ້ປຸກລະດົມໃຫ້ປະຊາຊົນ ເປັນເຈົ້າການໃນການຄວບຄຸມໜອນນ້ຳຍຸງລາຍ ໂດຍສະເພາະ ຄອບຄົວໂດຍອີງໃສ່ການຈັດຕັ້ງປະຕິບັດຫຼັກການ 5ປ ໂດຍສະເພາະ ໃນໄລຍະລະດູຝົນ ແລະ ຊຸກຍູ້ໃຫ້ຄອບຄົວມີສ່ວນຮ່ວມ ພ້ອມນັ້ນ ລາວກໍ່ໄດ້ຕິດຕາມເຝົ້າລະວັງ ສະພາບໄຂ້ຍຸງລາຍທຸກແຂວງໃນທຸກມື້ໆ ກໍ່ຄືໄດ້ຕິດຕາມຢ່າງໃກ້ຊິດ ເຮັດໃຫ້ທຸກພາກສ່ວນມີຄວາມຕື່ນຕົວ ປະກອບສ່ວນໃນການຕ້ານ ແລະ ຄວບຄຸມພະຍາດດັ່ງກ່າວ ສຳລັບປີນີ້ ມາຮອດປັດຈຸບັນ ລາວເຮົາມີຄົນເຈັບເປັນພະຍາດໄຂ້ເລືອດອອກ 200 ກໍລະນີ ຖ້າທຽບໃສ່ປະເທດອື່ນແມ່ນໜ້ອຍທີ່ສຸດ ນັ້ນກໍ່ຍ້ອນຄວາມເອົາໃຈໃສ່ຂອງທຸກພາກສ່ວນ ທີ່ໄດ້ຮ່ວມແຮງຮ່ວມໃຈກັນໃນການຈັດຕັ້ງປະຕິບັດວຽກງານປ້ອງກັນ ແລະ ຕ້ານພະຍາດໄຂ້ຍຸງລາຍ.
ແຫລ່ງຂ່າວ: ວຽງຈັນໃໝ່