ເກີດເຫດຕັກແຕນທຳລາຍຜົນຜະລິດຂອງປະຊາຊົນ ເສຍຫາຍເກືອບ 2.000 ເຮັກຕາໃນ 2 ເມືອງຄື: ໂພນທອງ ແລະ ເມືອງວຽງຄຳ ແຂວງຫຼວງພະບາງ ປະຊາຊົນສ່ວນໃຫຍ່ໄດ້ລະດົມກຳລັງຮ່ວມກັນ ຂ້າຕັກແຕນຕາຍແລ້ວ 8 ໂຕນກວ່າ ເພື່ອນຳເອົາໄປປຸງແຕ່ງເປັນອາຫານ ແລະ ເຮັດເປັນປຸ໋ຍຊີວະພາບ.
ທ່ານນາງ ສຸດາລັດ ແກ້ວບົວລະພາ ຮອງຂະແໜງປູກຝັງ ພະແນກກະສິກຳ ແລະ ປ່າໄມ້ແຂວງຫຼວງພະບາງ ໄດ້ເປີດເຜີຍຕໍ່ນັກຂ່າວສຳນັກຂ່າວສານປະເທດລາວ ໃນວັນທີ 16 ມິຖຸນາ 2015 ນີ້ວ່າ: ນັບແຕ່ເດືອນກັນຍາ 2014 ເປັນຕົ້ນມາ ໄດ້ເກີດມີຝຸງຕັກແຕນບິນອອກມາຈາກປ່າສະຫງວນ ແລະ ໄດ້ເຂົ້າທຳລາຍພືດຜົນຜະລິດຂອງປະຊາຊົນ ຢູ່ເມືອງໂພນທອງ ເຊິ່ງໃນໄລຍະນັ້ນ ມີຜົນຜະລິດຂອງປະຊາຊົນເສຍຫາຍໃນວົງແຄບ ແລະ ສາມາດຂ້າຕັກແຕນໄດ້ປະມານ 3 ໂຕນ ຕໍ່ມາປະມານເດືອນມີນາ ຫາມິຖຸນາ 2015 ຝຸງຕັກແຕນໄດ້ລະບາດແຜ່ລາມອອກເປັນວົງກວ້າງ ເຂົ້າຫາເມືອງວຽງຄຳ ຈົນບໍ່ສາມາດຄວບຄຸມໄດ້ເຖິງແມ່ນວ່າຈະມີການລະດົມປະຊາຊົນ ໃຊ້ວິທີແບບຊາວບ້ານຂ້າຕັກແຕນ ແຕ່ເຫັນວ່າຍິ່ງແຜ່ຫຼາຍເພີ່ມຂຶ້ນນັບມື້ ປັດຈຸບັນນີ້ ພວກເຮົາສາມາດຂ້າຕັກແຕນໄດ້ແລ້ວປະມານ 8 ໂຕນ ມີບາງຄອບຄົວ ກໍ່ນຳເອົາໄປປຸງແຕ່ງເປັນອາຫານ ແລະ ບາງຄອບຄົວ ກໍ່ນຳເອົາໄປເຮັດປຸ໋ຍຊີວະພາບ.
ທ່ານນາງ ສຸດາລັດ ຍັງແຈ້ງໃຫ້ຮູ້ຕື່ມວ່າ: ການລະບາດຄັ້ງນີ້ ຖືວ່າເປັນປາກົດການຄັ້ງທຳອິດ ເທົ່າທີ່ເຄີຍເຫັນຜ່ານມາ ຍິ່ງກວ່ານັ້ນຕັກແຕນສາຍພັນນີ້ ມີລັກສະນະການອອກແມ່ແຜ່ລູກໄວ ແລະ ມີຈຳນວນຫຼາຍທີ່ສຸດ ໂດຍສະເລັ່ຍ 1 ໂຕສາມາດເກີດລູກໄດ້ 14 ໂຕ ນອກຈາກນັ້ນ ຍັງເປັນສາຍພັນທີ່ຕາຍຍາກ ເພາະວ່າພວກເຮົາໄດ້ເອົາຢາປາບສັດຕູພືດສີດໃສ່ ແລະ ບາງໂຕສາມາດກັບມາມີຊີວິດໄດ້ອີກ ແນວໃດກໍ່ດີ ປັດຈຸບັນນີ້ ພວກເຮົາໄດ້ຂໍຄວາມຊ່ວຍເຫຼືອຈາກລັດຖະບານ ສປ ຈີນ ແລະ ສາມາດກຳຈັດຕັກແຕນໄດ້ຈຳນວນໜຶ່ງແລ້ວ.
ແຫລ່ງຂ່າວ: ວຽງຈັນໃໝ່