ໃນວັນທີ 16 ມິຖຸນານີ້ ສຳນັກຂ່າວຕ່າງປະເທດ ໄດ້ມີການເຜີຍແຜ່ພາບພູເຂົາໄຟຊິນາບຸງ ເທິງເກາະສຸມາດຕາ ທາງພາກຕາເວັນຕົກຂອງປະເທດອິນໂດເນເຊຍ ລະເບີດຂຶ້ນຄັ້ງໃໝ່ ໂດຍໄດ້ຜົ່ນຂີ້ເຖົ່າພູເຂົາໄຟເປັນສີດຳປຸ້ມຂຶ້ນສູ່ເທິງຟ້າ ເລີ່ມແຕ່ວັນທີ 14 ມິຖຸນາຜ່ານມາ ເຮັດໃຫ້ທາງການສັ່ງໃຫ້ມີການອົບພະຍົບປະຊາຊົນ ຫລາຍກ່ວາ 1,200 ຄົນ ອອກຈາກພື້ນທີ່ສ່ຽງໄພແລ້ວ.
ດ້ານນັກວິທະຍາສາດຫລາຍຄົນມີຄວາມວິຕົກ ແລະ ເປັນຫ່ວງວ່າ ພູເຂົາໄຟຊິນາບຸງ ອາດກໍ່ໃຫ້ເກີດອັນຕະລາຍໃນອີກບໍ່ພໍເທົ່າໃດອາທິດຂ້າງໜ້ານີ້ ເນື່ອງຈາກໃນມື້ວານນີ້ (15 ມິຖຸນາ) ແມ່ນໄດ້ພົບມີຫີນແຮ່ຈາກພູເຂົາໄຟ, ລາວາຮ້ອນ ແລະ ເຖົ່າຖ່ານໄຫລອອກມາຈາກພູເຂົາໄຟຢ່າງວ່ອງໄວ ເຊິ່ງສາມາດນັບໄດ້ຢ່າງໜ້ອຍ 28 ຄັ້ງ.
