ທ່ານ ສຸດ​ທະນີ ໄຊ​ຍະ​ສານ ຮອງ​ຫົວໜ້າ​ພະ​ແນກ​ສຶກ​ສາ​ທິການ ແລະ ກີລາ ນະຄອນຫຼວງວຽງ​ຈັນ (ນວ) ໄດ້​ກ່າວ​ວ່າ: ການຫ້າງ​ຫາ​ກະກຽມ​ສອບເສັງ ມ4 ແລະ ມ7 ໄດ້​ເລີ່ມ​ມາ​ແຕ່​ພາກຮຽນ​ທີ II ເປັນຕົ້ນ​ມາ​ ໂດຍ​ສະເພາະ ໄດ້​ເປີດ​ກອງ​ປະຊຸມ​ຜູ້​ອຳນວຍ​ການ​ໂຮງຮຽນ ເພື່ອ​ພ້ອມກັນ​ຄົ້ນຄວ້າ​ປຶກສາ​ຫາລື​ໃນ​ການກະກຽມ ຄວາມ​ພ້ອມ​ເຂົ້າ​ສູ່​ການສອບເສັງ.

ທົ່ວ ນະຄອນຫລວງວຽງຈັນ ມີ​ໂຮງຮຽນ​ມັດ​ທະຍົມ 158 ແຫ່ງ (ລວມ​ທັງ​ໂຮງຮຽນ​ສົງ 6 ແຫ່ງ) ໃນ​ນັ້ນ ໂຮງຮຽນ​ມັດທະຍົມ​ຕົ້ນ 70 ແຫ່ງ ໂຮງຮຽນ​ມັດທະຍົມ​ປາຍ 10 ແຫ່ງ ແລະ ໂຮງຮຽນ​ມັດທະຍົມສຶກ​ສາ​ສົມບູນ 78 ແຫ່ງ ຊັ້ນ ມ4 ມີ​ນັກຮຽນ​ທັງ​ໝົດ 12.409 ຄົນ ຍິງ 6.057 ຄົນ ມ7 ມີ​ທັງໝົດ 9.049 ຄົນ ຍິງ 4.439 ຄົນ ແລະ ທົ່ວ ນວ ໄດ້​ແບ່ງ​ສູນ​ສອບເສັງ​ຂັ້ນ ມ4 ມີ 24 ສູນ ແບ່ງ​ເປັນ 503 ຫ້ອງ ສະເລ່ຍ​ໃສ່​ນັກຮຽນສອບເສັງ 25 ຄົນ​ຕໍ່​ຫ້ອງ ມ7 ມີ 18 ສູນ ແບ່ງ​ເປັນ 403 ຫ້ອງ ສະເລ່ຍ​ຫ້ອງ​ລະ 22 ຄົນ.

ຊັ້ນ ມ4 ກຳນົດ​ການ​ສອບເສັງ​ໃນ​ລະຫວ່າງ​ວັນ​ທີ 16-18 ມິຖຸນາ 2015 ມີ​ຈຳນວນ 5 ວິຊາ​ຄື: ວິຊາ​ຄະນິດສາດ ວິທະຍາສາດ​ທຳ​ມະ​ຊາດ ພາສາ​ລາວ-ວັນນະຄະດີ ວິທະຍາສາດ​ສັງຄົມ ແລະ ວິຊາ​ສຶກ​ສາ​ພົນລະເມືອງ ສ່ວນ​ຊັ້ນ ມ7 ກຳນົດ​ການ​ສອບເສັງລະຫວ່າງ​ວັນ​ທີ 23-26 ມິຖຸນາ 2015 ມີ 8 ວິຊາຄື: ວິຊາ​ຄະນິດສາດ ຟີ​ຊິກ​ສາດ ເຄ​ມີສາດ ຊີວະ​ສາດ ພາສາ​ລາວ-ວັນນະ​ຄະດີ ພູມ​ສາດ ປະຫວັດສາດ ແລະ ສຶກ​ສາ​ພົນລະເມືອງ ມາຮອດ​ປັດຈຸບັນ​ ຖື​ວ່າການ​ກຽມຄວາມ​ພ້ອມ​ໃນ​ການ​ສອບເສັງແມ່ນ​ສຳເລັດ 100%.

ພິທີ​ເປີດ​ຂະ​ບວນ​ການ​ສອບເສັງ​ຊັ້ນ​ມັດທະຍົມ​ສຶກ​ສາ ​ປະຈຳສົກຮຽນ 2014-2015 ໄດ້​ຈັດ​ຂຶ້ນວັນ​ທີ 12 ມິຖຸນາ 2015 ທີ່​ໂຮງຮຽນ​ມັດທະຍົມ​ສຶກ​ສາ​ຕອນ​ປາຍມິດຕະພາບ ນະຄອນຫຼວງ​ວຽງຈັນ-ໂຮ່​ຈິ​ມິງ (ມັດທະຍົມ​ສຶກ​ສາຕອນ​ປາຍ​ສີ​ໂຄດ​ຕະບອງ) ໂດຍມີ​ທ່ານ ​ດຣ.ນາງ ສີ​ສຸກ ວົງ​ວິຈິດ ຫົວໜ້າ​ກົມ​ມັດທະຍົມ​ສຶກ​ສາ ກະຊວງ​ສຶກ​ສາ​ທິ​ການ ແລະ ກີລາ ທັງ​ເປັນ​ປະທານ​ຄະນະ​ກຳ​ມະການ​ສອບເສັງ​ລະດັບ​ຊາດ ທ່ານຫົວໜ້າ​ພະ​ແນກ​ສຶກ​ສາ​ທິ​ການ ແລະ ກີລາ ນະຄອນຫລວງວຽງຈັນ ບັນດາ​ຫົວໜ້າຫ້ອງການ​ສຶກ​ສາ​ເມືອງ ຜູ້​ອຳນວຍ​ການ​ໂຮງຮຽນ ພະນັກງານ ຄູ-ອາຈານ ແລະ ນັກຮຽນ​ເຂົ້າຮ່ວມ.

ແຫລ່ງຂ່າວ: ວຽງຈັນໃໝ່