ຊາວອິນໂດເນເຊຍຫລາຍກ່ວາ 1,200 ຄົນ ຕ້ອງອົບພະຍົບອອກຈາກທີ່ຢູ່ອາໄສເພີ່ມຕື່ມ ຫລັງຈາກທີ່ພູເຂົາໄຟຊິນາບຸງ ເທິງເກາະສຸມາດຕາ ເກີດການລະເບີດຮອບໃໝ່ໃນທ້າຍອາທິດທີ່ຜ່ານມາ.
ສຳນັກຂ່າວຕ່າງປະເທດ ລາຍງານໃນວັນທີ 16 ມິຖຸນານີ້ວ່າ ທາງການອິນໂດເນເຊຍໄດ້ມີຄຳສັ່ງໃຫ້ອົບພະຍົບປະຊາຊົນ ໃນມື້ວັນຈັນທີ 15 ມິຖຸນາຜ່ານມານີ້ ຫລັງຈາກທີ່ພູເຂົາໄຟຊິນາບຸງ ເຊິ່ງມີຄວາມສູງປະມານ 2,600 ແມັດ ໄດ້ມີການລະເບີດຂຶ້ນຮອບໃໝ່ ໃນທ້າຍອາທິດທີ່ຜ່ານມາ ເຮັດໃຫ້ມີຂີ້ເຖົ່າຮ້ອນໄຫລອອກມາຕາມທາງລາດອຽງຂອງເນີນພູ ເຮັດໃຫ້ການອົບພະຍົບໃນເທື່ອນີ້ ລວມກັບຄັ້ງກ່ອນທີ່ມີການອົບພະຍົບຊາວບ້ານອອກກ່ອນແລ້ວໃນຕົ້ນເດືອນຜ່ານມາ ເປັນທັງໝົດເກືອບ 4,000 ຄົນ ແລ້ວ ແລະ ທາງເຈົ້າໜ້າທີ່ທະຫານໃນທ້ອງຖິ່ນກໍລະບຸວ່າ ພວກເຂົາມີແຜນຈະອົບພະຍົບປະຊາຊົນອອກຕື່ມອີກ 5 ເຖິງ 6 ບ້ານ ໃນອີກບໍ່ພໍເທົ່າໃດມື້ຂ້າງໜ້ານີ້ ເຊິ່ງມີປະຊາຊົນລວມກັນກ່ວາ 2,500 ຄົນ.
ທັງນີ້ ພູເຂົາໄຟຊິນາບຸງ ແມ່ນມີການລະເບີດຄັ້ງຮຸນແຮງມາແລ້ວໃນເດືອນກຸມພາ ປີ2014 ເຮັດໃຫ້ມີຜູ້ເສຍຊີວິດຢ່າງໜ້ອຍ 16 ຄົນ ແລະ ຫລາຍພັນຄົນຕ້ອງອົບພະຍົບໄປສູ່ສະຖານທີ່ປອດໄພ ເຊິ່ງພູເຂົາໄຟລູກດັ່ງກ່າວນີ້ ແມ່ນເປັນໜຶ່ງໃນຈຳນວນພູເຂົາໄຟທັງໝົດປະມານ 129 ໜ່ວຍ ທີ່ຍັງຄົງມີພະລັງຢູ່ໃນທົ່ວອິນໂດເນເຊຍ.
