ທ່ານຊົມພູ ແກ້ວປັນຍາ ຫົວໜ້າພະແນກສຶກສາທິການ ແລະ ກິລານະຄອນຫລວງວຽງຈັນ ໃຫ້ສຳພາດຕໍ່ນັກຂ່າວລາວພັດທະນາໃນວັນທີ 12 ມິຖຸນານີ້ວ່າ: ມາຮອດປັດຈຸບັນນີ້ການກະກຽມຈັດການສອບເສັງເລື່ອນຂັ້ນທົ່ວນະ ຄອນຫລວງວຽງຈັນໃນສົກປີ 2014-2015 ນີ້ແມ່ນມີຄວາມພ້ອມແລ້ວ 100% ບໍ່ວ່າຈະເປັນສະຖານທີ່ກໍຄືສູນສອບເສັງ, ອຸປະກອນຮັບໃຊ້ເຂົ້າໃນການສອບເສັງ, ງົບປະມານ ແລະ ອື່ນໆ.
ການສອບເສັງຈົບຊັ້ນມັດທະຍົມຕອນຕົ້ນ (ມ 4) ທົ່ວນະຄອນຫລວງວຽງຈັນແມ່ນຈະມີຂຶ້ນໃນລະຫວ່າງວັນທີ 16-18 ມິຖຸນານີ້, ໂດຍຈະມີນັກຮຽນເຂົ້າຮ່ວມສອບເສັງທັງໝົດ 12.409 ຄົນ, ຍິງ 6.057 ຄົນ, ແບ່ງອອກເປັນ 24 ສູນສອບເສັງ, ລວມມີ 503 ຫ້ອງສອບເສັງ, ເຊິ່ງຫ້ອງ 1 ສາມາດບັນຈຸນັກສອບເສັງໄດ້ປະມານ 23 ຄົນ, ມີກຳມະການຍາມຫ້ອງເສັງ 2 ຄົນ/ຫ້ອງ ແລະ ວິຊາທີ່ຈະ
ສອບເສັງມີ 5 ວິຊາຄື: ວິຊາຄະນິດສາດ, ວິທະຍາສາດ-ທຳມະຊາດ, ວິທະ ຍາສາດ-ສັງຄົມ, ພາສາລາວ-ວັນນະຄະດີ ແລະສຶກສາພົນລະເມືອງ. ສ່ວນຊັ້ນມັດທະຍົມຕອນປາຍ (ມ7) ແມ່ນຈະຈັດຂຶ້ນໃນລະຫວ່າງວັນທີ 23-26 ມິຖຸນານີ້, ຄາດວ່າຈະມີນັກສອບເສັງເຂົ້າຮ່ວມທັງໝົດ 9.049 ຄົນ, ຍິງ 4.439 ຄົນ, ແບ່ງອອກເປັນ 18 ສູນ, ລວມມີ 403 ຫ້ອງສອບເສັງ, ເຊິ່ງແຕ່ລະຫ້ອງຈະມີນັກສອບເສັງປະມານ 22 ຄົນ/ກຳມະການ 2 ຄົນ/ຫ້ອງ ແລະ ມີ 8 ວິຊາຄື: ວິຊາຄະນິດສາດ, ຟີຊິກສາດ, ຊີວະສາດ, ເຄມີສາດພາສາລາວ, ພູມສາດ, ສຶກສາພົນລະເມືອງ ແລະ ປະຫວັດສາດ.
ທ່ານຊົມພູ ແກ້ວປັນຍາ ຍັງໃຫ້ຮູ້ຕື່ມວ່າ: ອີງຕາມການຈັດຕັ້ງປະຕິບັດແຜນການສຶກສາ ແຕ່ລະໄລຍະຂອງກະ ຊວງສຶກສາທິການ ແລະ ກິລາວາງອອກ ໃຫ້ມີປະສິດທິຜົນ, ທາງພະແນກການພວກເຮົາກໍໄດ້ເລັ່ງຍົກສູງຄຸນນະພາບການຮຽນ-ການສອນຕາມຫລັກສູດ ແລະ ນຳໃຊ້ປຶ້ມແບບຮຽນທີ່ສະຖາບັນຄົ້ນຄວ້າວິທະຍາສາດການສຶກສາໄດ້ພັດທະນາຂຶ້ນ, ພ້ອມຈັດສົ່ງຄູ-ອາຈານໄປຍົກລະດັບຢູ່ວິທະຍາໄລຕ່າງໆ ແລະ ໄດ້ຈັດຕັ້ງການຮຽນເພີ່ມໃຫ້ນັກຮຽນຜູ້ຮຽນອ່ານຕື່ມອີກ.
ແຫລ່ງຂ່າວ: ລາວພັດທະນາ