ສຳລັບການແຂ່ງຂັນບານເຕະ ຊີເກມ ຄັ້ງທີ 28 ທີ່ ປະເທດສິງກະໂປໃນຮອບຊີງຊະນະເລີດ ລະຫວ່າງ ທີມຊາດໄທ ແຊ້ມເກົ່າ ທັງເປັນແຊ້ມ 14 ສະໄໝ ພົບກັບ ທີມຊາດມຽນມາ ອະດີດແຊ້ມ 5 ສະໄໝ ເຊິ່ງຖືວ່າ ເປັນຮູບເງົາມ້ວນເກົ່າເລີຍກໍ່ວ່າໄດ້, ເຊິ່ງຮູບເງົາເລື່ອງນີ້ຕ້ອງຍ້ອນຄືນຫຼັງໄປເມື່ອປີ 1993 ຫຼື 22 ປີກ່ອນ ໃນຊີເກມ ຄັ້ງທີ 17 ທີ່ປະເທດ ສິງກະໂປ ເປັນເຈົ້າພາບເຊັ່ນດຽວກັນ, ເຊິ່ງໃນຕອນນັ້ນ ໄທ ເອົາຊະນະ ມຽນມາ ໄປຫວຸ ຫວິດ 4-3 ປະຕູໃນຮອບຊີງຊະນະເລີດນອກຈາກໄທຈະຄວ້າຫຼຽນຄຳໄປຄອງແລ້ວຍັງເປັນການແຈ້ງເກີດຂອງ ກຽດຕິ ສັກເສນາເມືອງ (ຊິໂກ້) (ຄູເຝິກທີມຊາດໄທຊຸດໃຫຍ່ ໃນປັດຈຸບັນ) ຜູ້ທີ່ຍິງປະຕູໄຊໃນຄັ້ງນັ້ນ.

ເຖິງຢ່າງໃດກໍ່ຕາມ, ເສັ້ນທາງສູ່ຮອບຊີງຊະນະເລີດບານເຕະ ຊີເກມ 2015 ຂອງທັງ 2 ທີມ ຖືວ່າຂ້ອນຂ້າງສົດໃສໂດຍມຽນມາເປັນທີມແຊ້ມກຸ່ມ A ມີ 10 ຄະແນນ ນັດທຳອິດ ຖະຫຼົ່ມ ອິນໂດເນ ເຊຍ 4-2 ເຊິ່ງເປັນການລ້າງແຄ້ນຫຼັງຈາກທີ່ພວກເຂົາເຂ່ຍ ມຽນມາ ຕົກຮອບທຳອິດໄປຢ່າງເຈັບແສບໃນຊີເກມ 2013, ນັດທີ 2 ເອົາຊະນະ ສິງກະໂປ ເຈົ້າພາບ ຫວຸດຫວິດ 2-1 ກ່ອນຈະໄລ່ຖະຫຼົ່ມພ້ອມທັງສົ່ງ ຟີລິບປິນ ກັບບ້ານ 5-1 ແລະ ນັດສຸດທ້າຍ ຫືດຂຶ້ນຄໍກ່ອນໄລ່ຕີສະເໝີ ກຳປູເຈຍ ສຸດມັນໃນທ້າຍເກມ 3-3 ຫຼັງເປັນຮອງເຖິງ 1-3 ປະຕູ ຜ່ານເຂົ້າຮອບຮອງຊະນະເລີດ ໄປພົບກັບ ທີມຊາດ ສສ ຫວຽດນາມ ທີມເຕັງແຊ້ມທີ່ມາພ້ອມກັບຜົນງານທີ່ຮ້ອນແຮງດ້ວຍການຖະຫຼົ່ມ ບູໄນ 6-0, ຊະນະ ລາວ 1-0, ຖະຫຼົ່ມ ມາເລເຊຍ 5-1, ຖະຫຼົ່ມ ຕີມໍ ເລສເຕ 4-0 ກ່ອນຈະເສຍ ໃຫ້ໄທ 1-3 ນັດນີ້ທຸກຄົນຕ່າງກໍ່ເຫັນວ່າ ມຽນມາ ເປັນຮອງຢ່າງສິ້ນເຊີງແຕ່ໃນທີ່ສຸດ ‪‎ຊິຕູອອງ‬ ກັບ ເນລິນຕັນ ກໍ່ຊ່ວຍກັນຍິງຄົນລະປະຕູໃຫ້ມຽນມາ ເອົາຊະນະ ຫວຽດນາມ ຫວຸດ ຫວິດ 2-1 ຜ່ານເຂົ້າຮອບຊີງຊະນະເລີດໄດ້ເປັນຄັ້ງທຳອິດ ໃນຮອບ 22 ປີ ສ່ວນ ຫວຽດນາມ ຮັກສາສະຖິຕິເຂົ້າໄດ້ພຽງຮອບ 4 ທີມເປັນສະໄໝທີ 2 ຕິດຕໍ່ກັນ.

ໃນຂະນະທີ່ ທີມຊາດໄທ ພວກເຂົາມາເພື່ອປ້ອງກັນແຊ້ມເຊິ່ງຜົນງານກໍ່ໂດດເດັ່ນບໍ່ໜ້ອຍໜ້ານັດທຳອິດເອົາຊະນະ ລາວ ໄປແບບຂາດຮອຍ 6-0, ນັດທີ 2 ຊະນະ ຕີມໍ ເລສເຕ 2-1, ນັດທີ 3 ຊະນະ ມາເລເຊຍ 1-0, ນັດທີ 4 ຖະຫຼົ່ມ ບຣູໄນ 5-0 ແລະ ປິດທ້າຍ ດ້ວຍການກອດຄໍ ຫວຽດນາມ ເຂົ້າຮອບ 4 ທີມ 3-1 ປະຕູ ເປັນແຊ້ມ ກຸ່ມ A ມີ 15 ຄະແນນ ຜ່ານເຂົ້າຮອບ 4 ທີມໄປພົບກັບ ອິນໂດເນເຊຍ ຮອງແຊ້ມປີ 2013 ທີ່ຜ່ານເຂົ້າຮອບ 4 ທີມ ແບບຊ໊ອກແຟນບານເຈົ້າພາບ, ຫຼັງຈາກນັດສຸດທ້າຍພວກເຂົາເອົາຊະນະ ສິງກະໂປ ຫວຸດຫວິດ 1-0 ເຊິ່ງກ່ອນໜ້ານັ້ນ ທັງ 2 ທີມຕ້ອງລຸ້ນເຂົ້າຮອບໃນນັດສຸດທ້າຍ ໂດຍມີ 6 ຄະ ແນນເທົ່າກັນ.

ທັງນີ້, ຈາກສະຖິຕິພົບກັນຫຼ້າສຸດໃນຊີເກມ ທີມຊາດ ມຽນມາ ຖືວ່າບໍ່ໄດ້ເປັນຮອງ ທີມຊາດໄທ ແຕ່ຢ່າງໃດກໍ່ຕາມໂດຍໃນຊີເກມ 2013 ທີ່ມຽນມາເປັນເຈົ້າພາບ ໄທ ສະເໝີ ມຽນມາ 1-1 ໃນຮອບແບ່ງກຸ່ມ ນັດທີ 3 ຂອງກຸ່ມ ຕິດຕາມໄປພ້ອມກັນວ່າ ຢູ-23 ມຽນມາ ຈະເອົາຊະນະ ຢູ-23 ໄທ ແຊ້ມເກົ່າພ້ອມຄວ້າຫຼຽນຄຳມາຄ້ອງຄໍໄດ້ຫຼືບໍ່.
ຢ່າພາດ ມື້ນີ້ (15 ມິຖຸນາ) ເວລາ 19:30 ຖ້າຕິດຕາມວ່າໃຜຈະເປັນແຊ້ມບານເຕະໃນກິລາຊີເກມຄັ້ງທີ 28 ທີ່ປະເທດສິງດະໂປປເປັນເຈົ້າພາບ

ແຫຼ່ງຂ່າວຈາກ: ໜສພ ສຶກສາ-ກິລາ