ແຈ້ງຂ່າວດ້ວຍຄວາມໂສກເສ້າ ໃຫ້ທຸກທ່ານໄດ້ຮັບຮູ້ວ່າ ຫລວງປູ່ຄຳຕັນ ວໍຣະຣາຊ ອະດີດເຈ້າອາວາດວັດດົງປ່າລານ ອະດີດທີ່ປຶກສາ ອ ພ ສ ສູນກາງ ໄດ້ລະສັງຂານໄປແລ້ວ ໃນມື້ວັນທິດ 14/06/2558 ເວລາ 20:40 ນາທີ.
ຍາທ່ານ ຄຳຕັນ ວໍຣະຣາດ ເປັນຄົນເມືອງທຸລະຄົມ ບ້ານຢູ່ໃກ້ໆ ກັບພູເຂົາຄວາຍ ທ່ານບາດເປັນສາມະເນນ ຕັ້ງແຕ່ອາຍຸ 13 ປີ ແລະກໍຢູ່ໃນພູເຂົາສັກສິດ(ພູເຂົ້າຄວາຍ) ມາຕັ້ງແຕ່ນ້ອຍ ໂດຍທ່ານຢູ່ກັບ ຍາທ່ານເພັດ ປັດຈຸບັນເປັນເຈົ້າອາວາດວັດດົງປ່າລານ ເມືອງສີສັດຕະນາກ ນະຄອນຫຼວງວຽງຈັນ ແລະຈະທຽວຂຶ້ນໄປວັດປ່າ ພະບາດພູເຂົາຄວາຍ ເປັນໄລຍະໆ.
ຫລວງປູ່ຄຳຕັນ ວໍຣະຣາຊ ແມ່ນເປັນຜູ້ນຳພາສ້າງວັດປ່າພຣະບາດພູເຂົາຄວາຍ ເຊິ່ງຕາ່ມຄວາມເຊື່ອຂອງຜູ້ສັດທາໃນເລື່ອງຂອງໄສຍະສາດໄດ້ເຊື່ອວ່າ ພູເຂົາຄວາຍ ເປັນສະຖານທືີ່ສັກສິດ ມີຖ້ຳຄູຫານ້ອຍໃຫຍ່ສະຫລັບຊັບຊ້ອນໄປມາຢ່າງລຶກລັບ ແລະ ງຽບສະຫງົບ ໂດຍເປັນສະຖານທີ່ຢູ່ອາໄສ ສຳລັບຜູ້ທີ່ຕ້ອງການບຳເພັນພຽນຝຶກຈິດຂອງບັນດາພະທຸດົງ ແລະ ເຫລົ່າຜູ້ສະແຫວງບຸນທັງຫລາຍ ແລະ ເປັນຈຸດໝາຍສູງສຸດຂອງບັນດາຈອມຂະມັງເວດ ທີ່ຕ້ອງການເດີນທາງມາ ເພື່ອສຶກສາຄາຖາວິຊາອາຄົມ ແລະ ເວດມົນຕ່າງໆ.
ທັງນີ້ ຜູ້ທີ່ເຊື່ອຖືໃນເລື່ອງດັ່ງກ່າວ ໄດ້ໃຫ້ທັດສະນະວ່າ ພູເຂົາຄວາຍ ແມ່ນປຽບເໝືອນສູນລວມແຫ່ງວິຊາໄສຍະເວດ ເຊັ່ນດຽວກັບສຳນັກຕັກສິລາໃນຊົມພູທະວີບເມື່ອຄັ້ງອະດີດ ຫລື ປະເທດອິນເດຍໃນປັດຈຸບັນ ແລະ ບໍ່ແຕກຕ່າງໄປຈາກສຳນັກວັດເສົ້າຫລິນຂອງຈີນ ທີ່ເປັນແຫລ່ງຝຶກວິທະຍາຍຸດອີກດ້ວຍ ເຮັດໃຫ້ສະຖານທີ່ດັ່ງກ່າວນີ້ ບໍ່ພຽງແຕ່ຜູ້ສັດທາທີ່ເປັນຄົນລາວເທົ່ານັ້ນ ຫາກຍັງມີນັກສະແຫວງວິຊາໄສຍະສາດ ຈາກຕ່າງປະເທດ ເຊັ່ນຈາກປະເທດໄທ, ກຳປູເຈຍ ແລະ ມຽນມາ ກໍມີຄວາມຕ້ອງການທີ່ຈະເດີນທາງມາສະແຫວງຫາວິຊາຄວາມຮູ້ ຢູ່ພູເຂົາຄວາຍດັ່ງກ່າວນີ້.
ປັດຈຸບັນ ເຖິງແມ່ນຫລວງປູ່ຄຳຕັນ ວໍຣະຣາຊ ຈະໄດ້ຈາກໄປແລ້ວກໍຕາມ ແຕ່ວັດປ່າພຣະບາດພູເຂົາຄວາຍ ຍັງຄົງມີພຣະສົງ, ສາມະເນນ ແລະ ແມ່ຊີ ຈຳພັນສາຢູ່ເພື່ອບູລະນະສ້າງສາສືບໄປ.
ຮູບພາບຈາກ: Phra Phanthong Thong Phomyxay