ຂປລ. ໃນວັນທີ 12 ມິຖຸນາ 2015 ນີ້ ທີ່ກົມວັດທະນະທໍາມະຫາຊົນ ກະຊວງຖະແຫລງ ຂ່າວ,ວັດທະນະທໍາ ແລະ ທ່ອງທ່ຽວ (ຖວທ)ໄດ້ຈັດພິທີມອບ-ຮັບ ໜ້າທີ່ ລະຫວ່າງ ທ່ານ ສີແພງ ວົງປັນຍາ ຫົວໜ້າກົມວັດທະນະທໍາມະຫາຊົນຜູ້ເກົ່າ ແລະ ທ່ານນາງ ຈັນເພັດ ຄໍາຟອງ ຮັກສາການຫົວໜ້າກົມວັດທະນະທໍາມະຫາຊົນຜູ້ໃໝ່. ໂດຍໃຫ້ກຽດເຂົ້າຮ່ວມຂອງທ່ານ ສຈ.ດຣ.ບໍ່ແສງຄໍາ ວົງດາລາ ລັດຖະມົນຕີວ່າການກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ຫົວໜ້າກົມ-ຮອງກົມ ແລະ ພະ ນັກງານທີ່ກ່ຽວຂ້ອງ ເຂົ້າຮ່ວມ.
ໃນໂອກາດດັ່ງກ່າວ ທ່ານ ສຈ.ດຣ ບໍ່ແສງຄໍາ ວົງດາລາ ໄດ້ໃຫ້ກຽດໂອ້ລົມ ແລະ ຊີ້ນໍາວຽກງານບາງດ້ານ ໃຫ້ແກ່ຫົວໜ້າກົມຜູ້ໃໝ່ ຈົ່ງສືບຕໍ່ເອົາໃຈໃສ່ຊີ້ນໍາໆພາ ດ້ານການເມືອງແນວຄິດ ແລະ ມີຫລັກໝັ້ນການເມືອງໜັກແໜ້ນ, ນຳພາວຽກງານວິຊາສະເພາະ, ວຽກງານຄົ້ນຄ້ວາ ໃນການເປັນເສນາທິການໃຫ້ຂັ້ນເທິງ ໃນການຈັດຕັ້ງຜັນຂະຫຍາຍ ແນວທາງນະໂຍບາຍ ຂອງ ພັກ-ລັດ ແນໃສ່ປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ.