ສຳນັກຂ່າວຕ່າງປະເທດລາຍງານ ໃນວັນທີ 12 ມິຖຸນານີ້ວ່າ ເກີດເຫດຂັດຂ້ອງກັບເຮືອບິນສາຍການບິນມາເລເຊຍ ແອຣ໌ລາຍ ເສັ້ນທາງລະຫວ່າງເມືອງ ເມເບິ້ນ ປະເທດອົດສະຕາລີ ເພື່ອມຸ່ງໜ້າໄປນະຄອນຫລວງກົວລາລຳເປີ ຂອງມາເລເຊຍ ເມື່ອຕອນບ່າຍທີ່ຜ່ານມາ ເຮັດໃຫ້ເຮືອບິນຕ້ອງລົງຈອດສຸກເສີນ ຢູ່ສະໜາມບິນເມເບິ້ນຄືເກົ່າ ຫລັງຈາກທີ່ບິນຂຶ້ນສູ່ເທິງຟ້າໄດ້ບໍ່ພໍເທົ່າໃດນາທີ.
ຕາມການລາຍງານຂອງແຫລ່ງຂ່າວໄດ້ລະບຸວ່າ ຖ້ຽວບິນດັ່ງກ່າວ ແມ່ນຖ້ຽວບິນ MH148 ຂອງສາຍການບິນມາເລເຊຍ ແອຣ໌ລາຍ ເຊິ່ງຈາກການກວດສອບແລ້ວ ແມ່ນພົບວ່າມີໄຟໄໝ້ເກີດຂຶ້ນຢູ່ເຄື່ອງຈັກໜ່ວຍໜຶ່ງຂອງເຮືອບິນລຳດັ່ງກ່າວ.
ທັງນີ້ ຖ້ຽວບິນດັ່ງກ່າວໄດ້ທຳການບິນອ້ອມຢູ່ເທິງຟ້າເມືອງເມເບິ້ນຫລາຍຮອບ ເພື່ອເຜົາຜານເຊື້ອໄຟໃຫ້ເຫລືອໜ້ອຍທີ່ສຸດ ກ່ອນທີ່ຈະຕັດສິນໃຈລົງຈອດສຸກເສີນໄດ້ຢ່າງປອດໄພ ໂດຍເບື້ອງຕົ້ນຍັງບໍ່ທັນມີລາຍງານເຖິງຜູ້ໂດຍສານ ຫລື ລູກເຮືອໄດ້ຮັບບາດເຈັບຈາກເຫດການດັ່ງກ່າວນີ້ເທື່ອ.