ສານປະຊາຊົນຈີນ ຕັດສິນຕັດອິດສະຫລະພາບຕະຫລອດຊີວິດ ທ່ານ ໂຈວ ຢົງຄັ່ງ ອະດີດກຳມະການກົມການເມືອງສູນກາງພັກກອມມູນິດຈີນ ໂທດຖານຮັບສິນບົນ ໃນຊ່ວງຢູ່ໃນອຳນາດ.
ສຳນັກຂ່າວຕ່າງປະເທດ ລາຍງານໃນວັນທີ 12 ມິຖຸນານີ້ວ່າ ທ່ານ ໂຈວ ຢົງຄັ່ງ ອາຍຸ 72 ປີ ອະດີດກຳມະການກົມການເມືອງສູນກາງພັກກອມມູນິດຈີນ ໄດ້ຖືກສານປະຊາຊົນກາງ ໃນເມືອງທຽນຈິນ ທາງພາກຕາເວັນອອກສຽງເໜືອຂອງຈີນ ພິພາກສາຕັດອິດສະຫລະພາບຕະຫລອດຊີວິດ ໂທດຖານກະທຳຄວາມຜິດ ໃນຄະດີຮັບສິນບົນ ລວມທັງໃຊ້ອຳນາດໜ້າທີ່ບໍ່ຖືກຕ້ອງ ແລະ ເຈຕະນາເປີດເຜີຍຄວາມລັບຂອງຊາດ.
ແຫລ່ງຂ່າວໄດ້ລາຍງານວ່າ ສະຖານີໂທລະພາບທ້ອງຖິ່ນຂອງຈີນ ໄດ້ທຳການເຜີຍແຜ່ວີດີໂອການຕັດສິນຄະດີດັ່ງກ່າວ ໃນມື້ວານນີ້ (11 ມິຖຸນາ) ໂດຍລະບຸວ່າ ທ່ານ ໂຈວ ຢົງຄັ່ງ ໄດ້ຮັບສາລະພາບຜິດໃນທຸກຂໍ້ກ່າວຫາຕໍ່ຜູ້ພິພາກສາ ແລະ ເຂົາຍັງໄດ້ບອອກອີກວ່າ ຈະບໍ່ຂໍຍື່ນຄຳອຸທອນຕໍ່ຄຳຕັດສິນຂອງສານໃດໆ ທ່ານໄດ້ກ່າວວ່າ ” ຂ້າພະເຈົ້າເຂົ້າໃຈດີເຖິງອັນຕະລາຍ ຈາກສິ່ງທີ່ຂ້າພະເຈົ້າໄດ້ເຮັດຕໍ່ພັກ ແລະ ປະຊາຊົນ ຂ້າພະເຈົ້າຂໍສາລະພາບຜິດ ແລະ ຂໍສະແດງຄວາມເສຍໃຈ ຕໍ່ຄວາມຜິດທາງອາຍາທີ່ຂ້າພະເຈົ້າໄດ້ກະທຳໄວ້ ”
ທັງນີ້ ຕາມການລາຍງານຂອງສຳນັກຂ່າວຊິນຫົວຂອງຈີນ ໄດ້ລະບຸວ່າ ທ່ານ ໂຈວ ຢົງຄັ່ງ ຮັບເງິນສົນບິນລວມທັງໝົດເຖິງ 130 ລ້ານຢວນ ຫລື ປະມານ 21.3 ລ້ານໂດລາ ໃນໄລຍະເວລາ 7 ປີທີ່ເຂົາຢູ່ໃນຕຳແໜ່ງ, ຢ່າງໃດກໍຕາມ ຊັບສິນທີ່ເຂົາໄດ້ມາໂດຍບໍ່ຖືກຕ້ອງເຫລົ່ານີ້ ໄດ້ຖືກຍຶດຄືນມາເປັນຂອງລັດ ໂດຍທາງການໄດ້ຍຶດຊັບສິນຂອງຄອບຄົວ ທ່ານ ໂຈວ ຢົ່ງຄັ່ງ ລວມທັງໝົດເຖິງ 90,000 ລ້ານຢວນ ຫລື ປະມານ 140,000 ລ້ານໂດລາ.
ທ່ານ ໂຈວ ຢົ່ງຄັ່ງ ໄດ້ອອກຮັບເບ້ຍບຳນານໃນປີ 2012 ແລະ ຕໍ່ມາເຂົາກໍຕ້ອງຖືກທາງການຕັ້ງຂໍ້ກ່າວຫາກ່ຽວກັບຄະດີດັ່ງກ່າວ ເມື່ອທ່ານ ສີ ຈິ້ນຜິງ ໄດ້ກ້າວຂຶ້ນມາຮັບຕຳແໜ່ງເລຂາທິການໃຫຍ່ພັກ ແລະ ປະທານປະເທດຈີນຄົນໃໝ່.
