ຣັດເຊຍ ແລະ ອີຢິບ ດຳເນີນການຊ້ອມຮົບທາງທະເລຮ່ວມກັນເປັນຄັ້ງທຳອິດ ເພື່ອສານສຳພັນລະຫວ່າງສອງປະເທດ ໃນໄລຍະທີ່ຊາດຕາເວັນຕົກ ມີທ່າທີແຂງກະດ້າງຕໍ່ຄວາມໝັ້ນຄົງຂອງຣັດເຊຍ.

ສຳນັກຂ່າວຕ່າງປະເທດ ລາຍງານໃນວັນພຸດທີ 10​ ມິຖຸນາຜ່ານມານີ້ວ່າ ຣັດເຊຍ ແລະ ອີຢິບ ໄດ້ດຳເນີນການຊ້ອມຮົບທາງທະເລຮ່ວມກັນ ພາຍໃຕ້ຊື່ ຂົວແຫ່ງມິດຕະພາບ (Bridge of Friendship 2015) ເຊິ່ງເລີ່ມຕົ້ນຂຶ້ນໃນວັນທີ 10 ມິຖຸນາຜ່ານມາ ແລະ ຈະມີຈົນເຖິງວັນທີ 14 ມິຖຸນານີ້ ທີ່ທະເລເມດີແຕຣານຽນ ໃກ້ກັບຊາຍຝັ່ງຂອງປະເທດອີຢິບ.

ການຊ້ອມຮົບຄັ້ງນີ້ ມີເຮືອຮົບຂອງຣັດເຊຍ ແລະ ອີຢິບຫລາຍລຳເຂົ້າຮ່ວມ ເຊິ່ງຣັດເຊຍພະຍາຍາມທີ່ຈະສານສຳພັນກັບປະເທດອີຢິບ ເຊິ່ງເປັນປະເທດທີ່ມີປະຊາກອນຫລາຍທີ່ສຸດໃນກຸ່ມປະເທດອາຫລັບ ຫລັງຈາກທີ່ໄດ້ປະເຊີນໜ້າດ້ວຍສົງຄາມເຢັນຮູບແບບໃໝ່ກັບບັນດາປະເທດຕາເວັນຕົກ ນັບຕັ້ງແຕ່ວິກິດການອູແກຣນເມື່ອປີ 2014 ເປັນຕົ້ນມາ.