ບໍ່ວ່າຈະອະດີດຫລືປະຈຸບັນ ແມ່ຍິງຄືເຮົາກໍຍັງຄົງຫາທາງເພີ່ມຄວາມງາມ ເພື່ອເອີ້ນຄວາມຫມັ້ນໃຈໃຫ້ກັບຕົວເອງຢູ່ສະເໝີ “ດັດແຂ້ວໜ້າແຫລມ” ກໍຖືເປັນອີກທາງເລືອກໜຶ່ງທີ່ນິຍົມເຮັດກັນເພາະມີຄວາມເຊື່ອວ່າດັດແຂ້ວແລ້ວຈະເຮັດໃຫ້ໃບໜ້າເບິ່ງລຽວງາມຂຶ້ນໂດຍສະເພາະນ້ອງໆສາວໆທີ່ເຫັນເຫລົ່າບັນດາດາລາອອກມາຕອບຄຳຖາມກັບນັກຂ່າວທີ່ໜ້າເບິ່ງປ່ຽນ,ເບິ່ງງາມຫລືເບິ່ງດີຂຶ້ນວ່າ ບໍ່ໄດ້ເຮັດຫຍັງມາພຽງດັດແຂ້ວ” ກໍຍິ່ງເປັນການຕອກຢ້ຳວ່າການຈັດແຂ້ວຊ່ວຍໃຫ້ໃບໜ້າແຫລມຂຶ້ນໄດ້ແທ້
ແຕ່ໃນຄວາມເປັນຈິງຈຸດປະສົງຂອງທ່ານໝໍທີ່ໃຫ້ເຮົາດັດແຂ້ວເພາະແຂ້ວມີບັນຫາເຊັ່ນ ແຂ້ວເຈີງ ,ແຂ້ວລົ້ມ,ແຂ້ວຫ່າງແລະອື່ນໆ ໂດຍທ່ານໝໍສະເພາະທາງດ້ານການດັດແຂ້ວໄດ້ອອກມາຢືນຢັນວ່າການດັດແຂ້ວບໍ່ໄດ້ເຮັດໃຫ້ໜ້າເຮົາແຫລມນ້ອຍລົງໄດ້ ຊ້ຳບໍ່ໜຳບາງຄົນເຮັດອອກມາແລ້ວໜ້າອາດເບິ່ງໃຫຍ່ຂຶ້ນກວ່າເກົ່າກໍມີເພາະການດັດແຂ້ວບໍ່ໄດ້ເຮັດໃຫ້ຄາງກະໄຕຫລືກາມຂອງເຮົານ້ອຍລົງຈະມີກໍແຕ່ຮູບປາກຂອງເຮົາທີ່ປ່ຽນໄປເພາະການຈັດແຂ້ວເຮັດໃຫ້ແຂ້ວດ້ານໜ້າເຮົາຫົດເຂົ້າໄປໃນປາກເຮັດໃຫ້ຮີມສົບເຮົາຕິດກັນຫລາຍຂຶ້ນໂດຍລວມກໍເຮັດໃຫ້ເບິ່ງດີຂຶ້ນ
ປັດໄຈທີ່ເຮັດໃຫ້ໜ້າເຮົາອາດເບິ່ງແຫລມຂຶ້ນຫລັງດັດແຂ້ວ
– ນ້ຳໜັກຕົວຂອງເຮົາທີ່ລຸດລົງກໍອາດສົ່ງຜົນໃຫ້ໜ້າເຮົາເບິ່ງແຫລມຂຶ້ນ
– ບາງເທື່ອກ່ອນດັດແຂ້ວທ່ານໝໍຈະມີການຖອນແຂ້ວກາມເທິງແລະແຂ້ວກາມລຸ່ມຂອງເຮົາອອກຢ່າງລະ 2 ເລັ້ມເພື່ອປັບໂຄງສ້າງແຂ້ວ
– ທ່ານໝໍອາດແກ້ການສົບເລິກຂອງແຂ້ວເຮົາເຮັດໃຫ້ໃບໜ້າຊ່ວງລຸມເບິ່ງຍາວຂຶ້ນພໍທ່ານໝໍດຶງກາມລຸ່ມລົງແລະດຶງກາມເທິງຂຶ້ນເລີຍເຮັດໃຫ້ຄາງກະໄຕເຮົາມີການປ່ຽນແປງນັ້ນເອງ
– ຊ່ວງອາຍຸກໍສຳຄັນເພາະຫາກເຮັດຕັ້ງແຕ່ໄວລຸ້ນກ່ອນອາຍຸ 14 -16 ປີໃນຜູ້ຍິງ ແລະ 18 ປີໃນຜູ້ຊາຍ ກໍມີໂອກາດເຮັດໃຫ້ໜ້າເບິ່ງແຫລມຂຶ້ນຫລາຍກວ່າເຮັດໃນໄວຜູ້ໃຫຍ່ແຕ່ກໍອາດຊ່ວຍໄດ້ພຽງເລັກນ້ອຍເທົ່ານັ້ນ
ສ່ວນບາງຄົົນທີ່ເຮັດແລ້ວເບິ່ງດີຂຶ້ນອາດເປັນເພາະຢູ່ໃນໄລຍະໄວທີ່ຮູບໜ້າມີການປ່ຽນແປງພໍດີ ເລີຍເຮັດໃຫ້ຄົນສ່ວນໃຫຍ່ເຂົ້າໃຈຜິດຄິດວ່າດັດແຂ້ວໜ້າແຫລມເຮັດໃຫ້ເບິ່ງດີຂຶ້ນໄດ້ຊຶ່ງແທ້ໆແລ້ວໜ້າແຫລມເປັນພຽງຜົນພອຍໄດ້ຈາກການດັດແຂ້ວໃນບາງຄົນເທົ່ານັ້ນທັງນີ້ຂຶ້ນຢູ່ກັບທືນເກົ່າ (ກຳມະພັນ) ຂອງແຕ່ລະຄົນ
ຮູ້ແລ້ວວ່າການດັດແຂ້ວໜ້າແຫລມນັ້ນກໍອາດຈະບໍ່ໄດ້ເຮັດໃຫ້ໜ້າເຮົາແຫລມຂຶ້ນແທ້ໆທັງໝົດທັງມວນກໍຂຶ້ນຢູ່ກັບຕົ້ນທຶນເກົ່າຂອງເຮົານີ້ແຫລະດັ່ງນັ້ນຫາກຄິດຈະເຮັດແທ້ໆຄວນປຶກສາກັບທ່ານໝໍທີ່ຊ່ຽວຊານດ້ານການດັດແຂ້ວໃຫ້ດີກ່ອນຈະຕັດສິນໃຈ,ຂໍໃຫ້ສາວໆທຸກຄົນຄົ້ນພົບທາງອອກໃນການສ້າງຄວາມງາມທີ່ຖືກຕ້ອງໃຫ້ກັບຕົວເອງ