ບ່າວກາຊັກສະຖານ ອາຍຸ 20 ປີ ປອມໂຕເປັນຜູ້ຍິງເພື່ອເຂົ້າສອບເສັງແທນຜູ້ສາວ ແຕ່ປອມບໍ່ນຽນເລີຍຖືກກຳມະການຄຸມຫ້ອງເສັງກວດຈັບໄດ້.
ສຳນັກຂ່າວຕ່າງປະເທດ ລາຍງານໃນວັນທີ 10 ມິຖຸນາຜ່ານມານີ້ວ່າ ເຫດການດັ່ງກ່າວເກີດຂຶ້ນຢູ່ໂຮງຮຽນແຫ່ງໜຶ່ງ ໃນປະເທດກາຊັກສະຖານ ໂດຍ ທ້າວ ອາຍັນ ຊາເດມອບ ອາຍຸ 20 ປີ ລາວຮູ້ສຶກເປັນຫ່ວງຢ້ານແຟນເສັງບໍ່ໄດ້ ຍ້ອນແຟນບອກວ່າບໍ່ມີຄວາມໝັ້ນໃຈເລີຍ ລາວຈິ່ງເກີດແນວຄິດປອມໂຕເປັນຜູ້ຍິງ ເຮັດໃຫ້ຄ້າຍຄືກັບແຟນຂອງຕົນເອງ ດ້ວຍການເອົາວິກຝົມປອມມາໃສ່ ພ້ອມທັງໃສ່ເສື້ອ ແລະ ກະໂປງຂອງແຟນ ແລ້ວໄປເຂົ້າຫ້ອງສອບເສັງແທນ.
ແຕ່ພາຍຫລັງທີ່ລາວໄດ້ຍື່ນບັດປະຈຳຕົວນັກຮຽນ ໃຫ້ແກ່ກຳມະການຄວບຄຸມຫ້ອງເສັງ ກໍເລີຍເຮັດໃຫ້ກຳມະການຫົນຫວຍມຶນງົງທັນທີ ເມື່ອເບິ່ງຮູບໃນບັດປະຈຳຕົວ ແລະ ຕົວຈິງຂອງລາວແລ້ວ ແມ່ນເປັນຄົນລະເລື່ອງກັນເລີຍ ເຮັດໃຫ້ລາວໄດ້ຖືກນຳຕົວໄປສອບສວນ.
ຜ່ານການສອບສວນຈິ່ງໃຫ້ຮູ້ວ່າ ທ້າວ ຊາເດມອບ ໄດ້ຖືກປັບໃໝເງິນຕາມກົດລະບຽບ ຈາກຂໍ້ຫາພະຍາຍາມທຸຈະລິດການສອບເສັງ, ແນວໃດກໍຕາມ ຫລາຍຄົນໄດ້ໃຫ້ຄວາມເຫັນຕໍ່ເລື່ອງນີ້ວ່າ ເຖິງແມ່ນຈະເປັນການຕັດສິນໃຈທີ່ໂງ່ຈ້າ ແຕ່ການກະທຳດັ່ງກ່າວນີ້ ຊ້ຳພັດເປັນເລື່ອງໂຣແມນຕິກສຸດໆ ສຳລັບຜູ້ສາວຄົນດັ່ງກ່າວ ທີ່ມີແຟນອາດຫານຊານໄຊສ່ຽງເຮັດເລື່ອງຄືແນວນີ້ ຍ້ອນຄວາມຮັກແຮງ.