ທັບນັກກິລາລາວເຮົາ ສາມາດຍາດຫຼຽນມາໄດ້ແລ້ວ 3 ຫຼຽນເງິນ ແລະ 8 ຫຼຽນທອງ ໃນການເຂົ້າຮ່ວມແຂ່ງຂັນງານມະຫາກໍາກິລາ ຊີເກມ ຄັ້ງທີ 28 ທີ່ປະເທດສິງກະໂປເປັນເຈົ້າພາບ, ໃນຂະນະທີ່ທັບນັກກິລາສິງກະໂປເຈົ້າພາບ ມາຮອດເວລາ 17 ໂມງ ສາມາດ ຍາດມາໄດ້ແລ້ວ 31 ຫຼຽນຄໍາ 22 ຫຼຽນເງິນ ແລະ 42 ຫຼຽນທອງ ເປັນຜູ້ນໍາໜ້າຕາຕະລາງສະຫຼຸບຫຼຽນຢູ່ໃນຂະນະນີ້.
ມາຮອດຕອນຄໍ່າວັນທີ 8 ມິຖຸນາ ຜ່ານມາ ຜົນງານຂອງທັບນັກກິລາລາວ ໃນການເຂົ້າຮ່ວມແຂ່ງຂັນ ງານມະຫາກຳກິລາຊີເກມ ຄັ້ງທີ 28 ກໍ່ຍັງບໍ່ທັນເຫັນຫຼຽນຄຳ ຍ້ອນຜົນການແຂ່ງຂັນຂອງນັກກິລາເປົ້າໝາຍຫຼຽນຄຳຢ່າງກິລາຢູໂດ, ມວຍວູຊູ ແລະ ເປຕັງກໍ່ຜິດຄວາມາດໝາຍ ສົ່ງຜົນໃຫ້ຜົນງານຂອງທັບນັກກິລາລາວ ຍາດມາໄດ້ເພີ່ມກໍ່ມີແຕ່ຫຼຽນທອງ 4 ຫຼຽນທອງ ໂດຍໄດ້ຈາກກິລາເປຕັງ 2 ຫຼຽນທອງ , ຢູໂດ 1 ຫຼຽນທອງ ແລະ ມວຍສາກົນອີກ 2 ຫຼຽນທອງ ລວມທັງໝົດ ເປັນ 3 ຫຼຽນເງິນ ແລະ 9 ຫຼຽນທອງ.
ສໍາລັບ 3 ຫຼຽນເງິນ ເປັນຜົນງານທີ່ຜິດເປົ້າໝາຍຂອງນັກກິລາ ຢູໂດ ນາງ ພອນນາລີ ໄຊຍະລາດ ເຈົ້າຂອງຫຼຽນຄຳ ຊີເກມ 3 ສະໄໝ ຮຸ່ນນໍ້າໜັກ 52 ກິໂລກຣາມ. ສ່ວນອີກ 2 ຫຼຽນເງິນນັ້ນ, ເປັນຜົນງານຂອງທີມນັກກິລາກະຕໍ້-ຊິນລອນ ທີ່ລົງແຂ່ງຂັນລາຍການລິງຄິງ ແລະ ລາຍການເທັກນິກຂັ້ນສູງ ຂະນະທີ່ ນັກກິລາກໍ່ປະກອບມີ ທ້າວໂຍທິນ ສົມບັດພູທອນ, ທ້າວ ວຽງນະຄອນ ກິດນາລີ, ທ້າວ ວິລິຍັນ ສົມບັດພູທອນ, ທ້າວ ຈັນທະລັກ ຈັນທະວົງ, ທ້າວ ສາຍຄຳ ສາຍຄຳ, ທ້າວ ບຸນຍົງ ເຄນພະຈັນ, ທ້າວ ພິດທະສັນ ບຸນປະເສີດ ແລະ ທ້າວ ວິໄຊ ພົມມະວົງສາ.
ສ່ວນ 9 ຫຼຽນທອງ ເປັນຜົນງານຂອງນັກກິລາເປຕັງ 4 ຫຼຽນທອງ ຄື ປະເພດຊຸດຕິ້ງຊາຍ-ຍິງ 2 ຫຼຽນທອງ ຄື: ທ້າວ ບົວແດງ ວົງວອນ ແລະ ນາງ ຄູນຄຳ ສຸກສະຫວັດ. ສ່ວນອີກ 2 ຫຼຽນທອງໄດ້ຈາກປະເພດຊາຍ-ຍິງດ່ຽວ ທ້າວ ພຸດທະລາ ແກ້ວກັນນີກາ ແລະ ນາງ ໂບວິລັກ ເທບພະກັນ. ສ່ວນອີກ 5 ຫຼຽນທອງ ກໍ່ເປັນຜົນງານ ເປັນຜົນງານຂອງ ທ້າວ ສຸກພະໄຊ ສິດທິສານ ນັກກິລາຢູໂດປະເພດຕໍ່ສູ້ ຮຸ່ນ 66 ກິໂລກຣາມ, ທ້າວ ເຂັມຄຳ ກົມມະນີວົງ ນັກກິລາຢູໂດປະເພດຕໍ່ສູ້ ຮຸ່ນ +100 ກິໂລກຣາມ, ທ້າວ ຄຳຫຼ້າ ສຸຂະພອນ ນັກກິລາຢູໂດ ຮຸ່ນນໍ້າໜັກ 60 ກິໂລກຣາມ, ທ້າວ ບຸນປອນ ລາຊະວົງສີ ນັກມວຍສາກົນຮຸ່ນ 46 ກິໂລກຣາມ ແລະ ທ້າວ ທອງບາງ ເຊື້ອພົມ ນັກມວຍສາກົນ ຮຸ່ນ 52 ກິໂລກຣາມ.
