ທັບນັກກິລາກະຕໍ້-ຊິນລອນຊາຍທີມຊາດລາວສ້າງຜົນງານໄດ້ຢ່າງໂດດເດັ່ນເກີນຄວາມຄາດໝາຍຍາດມາໄດ້ 2 ຫຼຽນເງິນໃນການແຂ່ງຂັນກິລາກະຕໍ້-ຊິນລອນງານມະຫາກຳກິລາຊີເກມຄັ້ງທີ 28 ທີ່ປະເທດສິງກະໂປເປັນເຈົ້າພາບລະຫວ່າງວັນທີ 5-16 ມິຖຸນານີ້, ໂດຍໄດ້ຈາກລາຍການລິງຄິງແລະລາຍການເທັກນິກຂັ້ນສູງ.
ການແຂ່ງຂັນກິລາກະຕໍ້-ຊິນລອນໃນງານມະຫາກຳກິລາຊີເກມຄັ້ງທີ 28 ໄດ້ເປີດສາກຂຶ້ນຢ່າງເປັນທາງການໃນວັນທີ 6 ມິຖຸນາຜ່ານມາທີ່ສູນກິລາກັລລັງປະເທດສິງກະໂປ, ໃນຂະນະທີ່ ສປປ ລາວເຮົາສົ່ງນັກກິລາລົງຊີງໄຊ 2 ລາຍການຄື: ລາຍການລິງຄິງ ແລະ ລາຍການເທັກນິກຂັ້ນສູງ, ຜ່ານການແຂ່ງຂັນປະກົດວ່າ ນັກກິລາກະຕໍ້-ຊິນລອນທີມຊາດລາວເຮົາ ທີ່ລົງຂ່ງຂັນໃນລາຍການລິງຄິງ ກໍ່ສາມດສ້າງຜົນງານພິກຄວາມຄາດໝາຍໄດ້ຫຼຽນເງິນມາຄອງ, ເມື່ອໃນການແຂ່ງຂັນຮອບຊີງຊະນະເລີດຫຼືຮອບຊີງຫຼຽນຄຳທັບນັກກິລາກະຕໍ້-ຊິນລອນທີມຊາດລາວ ເສຍໃຫ້ນັກກິລາທີມຊາດກຳປູເຈຍ0-2 ເຊັດ ໂດຍໃນເຊັດທຳອິດເສຍ 145-152 ແລະເຊັດທີ 2 ເສຍ 154-156 ລວມສອງເຊັດເສຍ299-308 ຄະແນນສົ່ງຜົນໃຫ້ຄວ້າພຽງຫຼຽນເງິນມາຄອງ.
ສ່ວນລາຍການເທັກນິກຂັ້ນສູງຮອບຊີງຫຼຽນຄຳນັກກິລາທີມຊາດລາວພົບກັບນັກກິລາທີມຊາມຽນມາເຈົ້າຂອງຕົ້ນສະບັບກິລາກະຕໍ້-ຊິນລອນ, ຜ່ານການແຂ່ງຂັນຜົນປາກົດວ່າລາວເຮົາສູ້ບໍ່ໄຫວ ເສຍໃຫ້ມຽນມາ 0-2ເຊັດດ້ວຍຄະແນນ 43-68 ແລະ 44-72 ລວມ 87-140 ຄະແນນຄວ້າຫຼຽນເງິນມາຄອງເຊັ່ນກັນ.
ສໍາລັບນັກກິລາກະຕໍ້-ຊິນລອນຊາຍທີມຊາດລາວ ປະກອບມີ ທ້າວ ໂຍທິນ ສົມບັດພູທອນ, ທ້າວ ວຽງນະຄອນ ກິດນາລີ, ທ້າວ ວິລິຍັນ ສົມບັດພູທອນ, ທ້າວ ຈັນທະລັກ ຈັນທະວົງ, ທ້າວ ສາຍຄຳ ສາຍຄຳ, ທ້າວ ບຸນຍົງ ເຄນພະຈັນ, ທ້າວ ພິດທະສັນ ບຸນປະເສີດ ແລະ ທ້າວ ວິໄຊ ພົມມະວົງສາ.
