ເຈົ້າໜ້າທີ່ ປກສ ແຂວງສະຫວັນນະເຂດໃຫ້ຮູ້ວ່າ: ພາຍຫລັງ, ໄດ້ຮັບແຈ້ງຈາກພົນລະເມືອງດີ ວ່າຈະມີການຂົນສົ່ງຢາເສບຕິດຈຳນວນຫລາຍ ໃນເຂດບ້ານໜອງ ບົວທ່າ ເມືອງສອງຄອນ ແຂວງສະຫວັນນະເຂດ, ຈຶ່ງໄດ້ຈັດກຳລັງຕັ້ງດ່ານກວດ ໃນຈຸດເສັ້ນທາງບ້ານດັ່ງກ່າວ ແລະ ພົບເຫັນເປົ້າໝາຍຂີ່ລົດຈັກຮອນດາເວບສີແດງດຳ ບໍ່ຕິດປ້າຍທະບຽນ ແລ່ນມາດ້ວຍຄວາມໄວ, ຈຶ່ງໄດ້ລັດໃຫ້ຈອດ ແລະ ກວດຄົ້ນພົບເຫັນຢາບ້າ 10 ພັນເມັດ, ຊຸກເຊື່ອງໄວ້ຢູ່ກ້ອງເບາະລົດ, ຈຶ່ງໄດ້ຈັບຕົວຜູ້ ກ່ຽວຄື: ທ້າວ ສີຟ້າ ອາຍຸ 34 ປີ ຢູ່ບ້ານໜອງບົວທ່າ ເມືອງສອງຄອນ ແລະ ຢືດຢາເສບຕິດດັ່ງກ່າວໄວ້ເປັນຫລັກຖານໃນການດຳເນີນ ຄະດີຕາມລະບຽບກົດໝາຍ ແລະ ຜ່ານການສືບສວນ-ສອບສວນ ຂອງເຈົ້າໜ້າທີ່ຜູ້ກ່ຽວຮັບສາລະພາບວ່າ: ຢາເສບຕິດຈຳນວນດັ່ງກ່າວເປັນຂອງຕົນແທ້ ໂດຍຊື້ມາຈາກຂະບວນການຄ້າຢາ ເສບຕິດຢູ່ບ້ານນາຍຸງ, ເມືອງສອງຄອນ ແລະ ໃນວັນດຽວ ກັນນັ້ນ, ເຈົ້າໜ້າທີ່ ປກສ ແຂວງສະຫວັນນະເຂດ, ກໍໄດ້ນຳກຳລັງເຂົ້າກວດຄົ້ນເຮືອນເປົ້າໝາຍຄ້າຢາເສບຕິດຫລັງໜຶ່ງ, ເຊິ່ງ ເຈົ້າຂອງເຮືອນໄດ້ຫລົບໜີກ່ອນ ແລະ ຜ່ານການກວດຄົ້ນພົບ ເຫັນຢາບ້າ 2 ແສນກວ່າເມັດ, ຢາໄອ 4 ຖົງ, ພ້ອມກັບລົດ ວີໂກ້ ສີປອນໝາຍເລກທະບຽນ ກຄ 4239 ສະຫວັນນະເຂດ, ລົດຮຸນໄດໝາຍເລກທະບຽນ ກຄ 7380 ສະຫວັນນະເຂດຈອດປະ ໄວ້ຢູ່ເຮືອນຫລັງດັ່ງກ່າວ, ຈຶ່ງໄດ້ຢຶດເປັນຫລັກຖານໄວ້ດຳເນີນຄະດີ ແລະ ຂະຫຍາຍຜົນຫາຜູ້ຮ່ວມຂະບວນການຄ້າຢາເສບຕິດລາຍໃຫຍ່ນີ້ຕໍ່ໄປ.
ແຫລ່ງຂ່າວ: ລາວພັດທະນາ