ເມື່ອບໍ່ດົນມານີ້, ເຈົ້າໜ້າທີ່ຄຸ້ມຄອງຄົນຕ່າງປະເທດ, ກະຊວງປ້ອງກັນຄວາມ ສະຫງົບ, ໄດ້ຈັດພິທີທຳລາຍຕູ້ເກມຜິດກົດໝາຍຫລາຍສີບໜ່ວຍ ທີ່ຢຶດໄດ້ຈາກ ບັນດາຮ້ານອາຫານ, ຮ້ານສະນຸກເກີຂອງຊາວຕ່າງປະເທດທີ່ລັກລອບ ເປີດໃຫ້ ບໍລິການຢູ່ໃນນະຄອນຫລວງວຽງຈັນ.
ທ່ານຮອງຫົວໜ້າກົມຕຳຫລວດຄຸ້ມຄອງຄົນຕ່າງປະເທດກົມໃຫຍ່ສັນຕິບານ ໃຫ້ຮູ້ວ່າ: ໃນໄລຍະຜ່ານມາ, ເຈົ້າໜ້າທີ່ຂອງຕົນໄດ້ລົງກວດກາ ແລະ ຢຶດຕູ້ເກມ ຍອດຫລຽນທີ່ບໍ່ໄດ້ຮັບອະນຸຍາດມາທຳລາຍຖີ້ມແລ້ວ 3 ຄັ້ງ, ຊຶ່ງລວມມີຈຳນວນ 144 ໜ່ວຍ ແລະ ພຽງແຕ່ຕົ້ນເດືອນມີນາຫາທ້າຍເດືອນພຶດສະພານີ້, ກໍສາມາດ ກວດກາ ແລະ ຢຶດໄດ້ຕື່ມອີກຈຳນວນ 52 ໜ່ວຍຢູ່ຕາມຮ້ານອາຫານ, ຮ້ານບັນເທິງ, ຮ້ານສະໜຸກເກີຂອງຊາວຫວຽດນາມ ແລະ ຈີນຢູ່ນະຄອນຫລວງວຽງຈັນ ແລະ ໄດ້ມາທຳລາຍຖິ້ມ.
ທ່ານຮອງຫົວໜ້າກົມດັ່ງກ່າວໃຫ້ຮູ້ວ່າ: ເຄື່ອງຫລິ້ນການພະນັນດັ່ງກ່າວ, ແມ່ນສາເຫດໜຶ່ງທີ່ພາໃຫ້ເກີດປະກົດການຫຍໍ້ ທໍ້ທາງສັງຄົມ ແລະ ໄລຍະຜ່ານມາເຖິງວ່າໄດ້ມີການກວດກາ, ຢຶດ, ທຳລາຍ ແລະ ສຶກສາອົບຮົມຜູ້ລັກລອບໃຫ້ບໍລິການມາ ຫລາຍຄັ້ງກໍຕາມ, ແຕ່ຍັງປະກົດມີສະພາບການລັກລອບນຳເຂົ້າ ແລະ ເປີດໃຫ້ບໍລິການດ້ວຍການແອບແຝງຢູ່ຕາມ ຫ້າງຮ້ານ ຕ່າງໆເປັນຈຳນວນຫລາຍ,ສະນັ້ນເພື່ອສະກັດກັ້ນບັນຫາດັ່ງກ່າວໃຫ້ຫລຸດໜ້ອຍລົງ,ຈະໄດ້ເພີ່ມທະວີການປະສານສົມທົບກັບເຈົ້າໜ້າທີ່ກ່ຽວຂ້ອງຢູ່ທ້ອງຖິ່ນ ລຽບຕາມຊາຍແດນເພື່ອເລັ່ງກວດກາ ແລະ ສະກັດການນຳເຂົ້າສີນຄ້າດັ່ງກ່າວໃຫ້ເຂັ້ມງວດກວ່າເກົ່າ.
ແຫລ່ງຂ່າວ: ລາວພັດທະນາ