ສ້າງສີສັນຮືຮາທົ່ວສັງຄົມອອນລາຍ ເມື່ອງານແຕ່ງດອງຄູ່ບ່າວສາວຊາວມາເລເຊຍ ມີໝູ່ເຈົ້າບ່າວ ແລະ ໝູ່ເຈົ້າສາວ ພາກັນແຕ່ງຊຸດຊຸບເປີ້ຮີໂຣ່ໃນຮູບເງົາ ມາຮ່ວມເປັນສັກຂີພິຍານ ຢ່າງພ້ອມພຽງ.
ສຳນັກຂ່າວຕ່າງປະເທດ ໄດ້ນຳສະເໜີເລື່ອງດັ່ງກ່າວ ໃນມື້ວັນທີ 1 ມິຖຸນານີ້ວ່າ ງານແຕ່ງດອງຂອງຄູ່ບ່າວສາວຊາວມາເລເຊຍຄູ່ໜຶ່ງ ເຊິ່ງຈັດຂຶ້ນໃນວັນທີ 30 ພຶດສະພາຜ່ານມານີ້ ໄດ້ສ້າງສີສັນແປກຕາສ້າງຄວາມຮືຮາທົ່ວສັງຄົມອອນລາຍໃນປັດຈຸບັນ ເມື່ອມີຜູ້ໃຊ້ເຟສບຸກຊື່ Siakap Keli ໄດ້ໂພສຕ໌ຮູບງານແຕ່ງດອງດັ່ງກ່າວ ທີ່ມີໝູ່ເຈົ້າບ່າວ ແລະ ເຈົ້າສາວ ພາກັນແຕ່ງກາຍດ້ວຍຊຸດຊຸບເປີ້ຮີໂຣ່ ແບບຮູບເງົາກາຕູນຍີ່ປຸ່ນ ຢ່າງພ້ອມພຽງຮຽງໜ້າ.
ທັງນີ້ ງານແຕ່ງດອງດັ່ງກ່າວ ໄດ້ເຮັດໃຫ້ຜູ້ທີ່ໄປຮ່ວມງານ ແລະ ລວມທັງຜູ້ທີ່ພົບເຫັນຮູບພາບດັ່ງກ່າວນີ້ ຕ່າງກໍພາກັນອົມຍິ້ມກັບສີສັນສຸດແປກ ຢູ່ໃນງານແຕ່ງດອງຂອງຊາວມາເລເຊຍຄູ່ນີ້ ເຊິ່ງເປັນງານແຕ່ງແບບຊາວມຸດສະລິມ ທີ່ມີການເຄັ່ງຄັດໃນປະເພນີຫລາຍ.
