ເພື່ອສົ່ງເສີມການຜະລິດກະສິກຳຂອງປະຊາຊົນບັນດາເຜົ່າ ໃຫ້ກາຍເປັນສິນຄ້າ ລັດຖະບານໄດ້ເອົາໃຈໃສ່ປະສານສົມທົບ ແລະ ຊອກຫາແຫຼ່ງທຶນກູ້ຢືມ ເພື່ອນຳໃຊ້ເຂົ້າໃນການສົ່ງເສີມວຽກງານດັ່ງກ່າວ ໃຫ້ເຕີບໃຫຍ່ຂະຫຍາຍຕົວຍິ່ງຂຶ້ນ ໃນປີ 2011 ລັດຖະບານ ກໍ່ຄືກະຊວງກະສິກຳ ແລະ ປ່າໄມ້ ໄດ້ເຮັດສັນຍາກູ້ຢືມກັບທະນາຄານພັດທະນາອາຊີ (ADB) ເພື່ອນຳມາຈັດຕັ້ງປະຕິບັດ ໂຄງການສົ່ງເສີມການຜະລິດກະສິກຳເປັນສິນຄ້າ ມູນຄ່າ 5 ລ້ານໂດລາສະຫະລັດ ຫຼື ປະມານ 40 ຕື້ກີບ ມີໄລຍະເວລາການປະຕິບັດງານ ແຕ່ປີ 2012-2014 ໂຄງການມີພື້ນທີ່ເປົ້າໝາຍຢູ່ 16 ເມືອງຂອງແຂວງວຽງຈັນ ຄຳມ່ວນ ສະຫວັນນະເຂດ ແລະ ແຂວງຈຳປາສັກ.
ການຈັດຕັ້ງປະຕິບັດໂຄງການສົ່ງເສີມຜະລິດກະສິກຳເປັນສິນຄ້າ ປະກອບມີ 4 ໜ້າວຽກໃຫຍ່ຄື: ການຊຸກຍູ້ສົ່ງເສີມຊາວກະສິກອນ ການພັດທະນາທຸລະກິດກະສິກຳ ແລະ ການຕະຫຼາດ ການພັດທະນາພື້ນຖານໂຄງລ່າງດ້ານກະສິກຳຢູ່ຊົນນະບົດ ແລະ ການຄຸ້ມຄອງບໍລິຫານໂຄງການທີ່ກ່ຽວພັນກັບວຽກງານກະສິກຳ ເພື່ອເຮັດໃຫ້ຄອບຄົວຊາວກະສິກອນຂະໜາດນ້ອຍ ໂດຍຕິດພັນກັບກຸ່ມທຸລະກິດກະສິກຳ ເຮັດໃຫ້ຜົນຜະລິດກະສິກຳມີມູນຄ່າເພີ່ມ ສ້າງຖານຕະຫຼາດທີ່ໝັ້ນຄົງ ເພື່ອຍົກລະດັບຊີວິດການເປັນຢູ່ຂອງເຂົາເຈົ້າ ໃຫ້ນັບມື້ດີຂຶ້ນເປັນກ້າວໆ ຜ່ານການປະຕິບັດຕົວຈິງ ເຫັນວ່າໂຄງການປະສົບຜົນສຳເລັດຕາມຄາດໝາຍວາງໄວ້ ໂດຍໂຄງການສາມາດສ້າງກຸ່ມການຜະລິດຂຶ້ນໃນ 24 ເມືອງ ຈຳນວນ 262 ກຸ່ມ 446 ບ້ານ ມີສະມາຊິກ 21.433 ຄົນ ໃນນັ້ນມີກຸ່ມການຜະລິດເປັນສິນຄ້າ 221 ກຸ່ມ 227 ບ້ານ ສະມາຊິກ 7.479 ຄົນ ໂຄງການສາມາດເຝິກອົບຮົມໃຫ້ຊາວກະສິກອນທັງໝົດ 3.406 ຄົນ.
ເພື່ອເປັນການສະຫຼຸບຕີລາຄາຄືນ ການຈັດຕັ້ງປະຕິບັດວຽກງານໂຄງການດັ່ງກ່າວ ລະຫວ່າງວັນທີ 27-28 ພຶດສະພາ 2015 ຢູ່ທີ່ສະຖາບັນຄົ້ນຄວ້າກະສິກຳ ແລະ ປ່າໄມ້ ໄດ້ຈັດກອງປະຊຸມຄະນະຊີ້ນຳ ໂຄງການສົ່ງເສີມຜະລິດກະສິກຳເປັນສິນຄ້າຂັ້ນສູນກາງ ໃນໂອກາດສິ້ນສຸດການດຳເນີນວຽກງານໂຄງການປະຕິບັດວຽກງານດັ່ງກ່າວ ເຂົ້າຮ່ວມມີທ່ານ ດຣ. ເພັດ ພົມພິພັກ ລັດຖະມົນຕີຊ່ວຍວ່າການກະຊວງກະສິກຳ ແລະ ປ່າໄມ້ ທັງເປັນປະທານຄະນະຊີ້ນຳໂຄງການ ພ້ອມດ້ວຍບັນດາຄະນະກຳມະການ ແລະ ຜູ້ຕາງໜ້າຈາກສູນກາງ-ທ້ອງຖິ່ນ.
ແຫລ່ງຂ່າວ: ວຽງຈັນໃໝ່