ນະຄອນຫຼວງວຽງຈັນ ຈັດກິດຈະກຳເນື່ອງໃນໂອກາດ ວັນເດັກນ້ອຍສາກົນ ວັນທີ 01 ມິຖຸນາ ຂຶ້ນໃນວັນທີ 30 ພຶດສະພາ 2015 ທີ່ພະແນກສຶກສາທິການ ແລະ ກີລາ ນະຄອນຫຼວງວຽງຈັນ ໂດຍມີທ່ານ ສາຍທອງ ແກ້ວດວງດີ ຮອງເຈົ້າຄອງນະຄອນຫຼວງວຽງຈັນ ທ່ານ ຊົມພູ ແກ້ວປັນຍາ ຫົວໜ້າພະແນກສຶກສາທິການ ແລະ ກີລາ ທ່ານນາງ ລຳພອຍ ສີອັກຄະຈັນ ປະທານສະຫະພັນແມ່ຍິງນະຄອນຫຼວງ ທ່ານຜູ້ຕາງໜ້າຈາກກະຊວງສຶກສາທິການ ແລະ ກີລາ ຈາກພະແນກສາທາລະນະສຸກນະຄອນຫຼວງ ແຂກຖືກເຊີນ ພະນັກງານ ຄູ-ອາຈານ ພໍ່ແມ່ຜູ້ປົກຄອງ ແລະ ນັກຮຽນເຂົ້າຮ່ວມ.
ໃນງານພາຍຫຼັງທ່ານຫົວໜ້າພະແນກສຶກສາທິການ ແລະ ກີລານະຄອນຫຼວງ ໄດ້ຂຶ້ນຜ່ານປະຫວັດຄວາມເປັນມາ ຄວາມໝາຍຄວາມສຳຄັນຂອງວັນເດັກນ້ອຍສາກົນ ພ້ອມທັງໄດ້ຮັບຟັງການໂອ້ລົມຈາກຂັ້ນເທິງແລ້ວ ຍັງມີກິດຈະກຳຢ່າງຫຼວງຫຼາຍ ເປັນຕົ້ນ ມີການຢອດຢາວິຕະມິນໃຫ້ແກ່ນັກຮຽນ ການປູກຕົ້ນໄມ້ ການສະແດງສິລະປະວັນນະຄະດີຂອງບັນດານ້ອງນັກຮຽນຈາກໂຮງຮຽນແຫ່ງຕ່າງໆ ທີ່ໄດ້ຮັບລາງວັນຊະນະເລີດໃນການແຂ່ງຂັນສິລະປະວັນນະຄະດີ ຂອງພະແນກສຶກສາທິການ ແລະ ກີລາ ຈັດຂຶ້ນ ໄດ້ນຳເອົາຜົນງານມາສະແດງ ພ້ອມນີ້ຍັງມີການຈັດກິດຈະກຳແຂ່ງຂັນກີລາ ວາງສະແດງຮູບພາບ ແຈກຂອງຂວັນລາງວັນ ຂອງບັນດາຫ້າງຮ້ານ ອົງການຈັດຕັ້ງທັງພາກລັດ-ເອກະຊົນ ທີ່ເຂົ້າມາຮ່ວມກິດຈະກຳ ພິເສດ ພາຍໃນງານຍັງມີການປະກອບສ່ວນຂອງບັນດາໂຮງຮຽນ ອົງການຈັດຕັ້ງຕ່າງໆ ໄດ້ນຳເອົາອາຫານ ແລະ ເຄື່ອງດຶ່ມມາບໍລິການໃຫ້ແກ່ຜູ້ເຂົ້າຮ່ວມງານໃນຄັ້ງນີ້ນຳອີກ.
ແຫລ່ງຂ່າວ: ວຽງຈັນໃໝ່