ສຳນັກຂ່າວຕ່າງປະເທດ ລາຍງານໃນວັນທີ 28 ພຶດສະພາຜ່ານມານີ້ວ່າ ຊາຍຈີນອາຍຸ 37 ປີ ເກີດຢູ່ເມືອງຈື່ຢາງ ແຂວງສານຊີ ທາງພາກເໜືອຂອງຈີນ ໂດຍໃນມື້ໜຶ່ງຂອງປີ 1986 ຂະນະນັ້ນເຂົາມີອາຍຸ 8 ປີ ໄດ້ອອກຈາກເຮືອນໄປຫລິ້ນສະຖານີລົດໄຟຄົນດຽວ ແລະ ໄດ້ປີນຂຶ້ນເທິງລົດໄຟ ແລ້ວລົດໄຟໄດ້ເຄື່ອນຕົວອອກຈາກສະຖານີ ໂດຍທີ່ເຂົາບໍ່ສາມາດລົງໄດ້ ເຮັດໃຫ້ເຂົາຕ້ອງເດີນທາງໄປນຳລົດໄຟ ຈົນຮອດແຂວງເສສວນ ເຊິ່ງຢູ່ທາງພາກຕາເວັນຕົກສຽງໃຕ້ຂອງປະເທດແລ້ວ.

ຊາຍຄົນດັ່ງກ່າວ ໄດ້ພະຍາຍາມຫາທາງກັບບ້ານຢູ່ຫລາຍມື້ ແຕ່ກໍບໍ່ສຳເລັດຜົນ ຈົນກ່ວາເຂົາໄດ້ພົບກັບຄອບຄົວໃຈບຸນຄອບຄົວໜຶ່ງ ເຊິ່ງໄດ້ອຸປະຖຳລ້ຽງດູເປັນລູກບຸນທຳ ແລະ ໄດ້ຕັ້ງຊື່ໃໝ່ໃຫ້ເຂົາອີກ ຈົນກ່ວາເວລາຜ່ານໄປເຖິງ 29 ປີ ເຂົາຈິ່ງຄິດຮອດແມ່ຜູ້ໃຫ້ກຳເນີດຂອງເຂົາຫລາຍ ຈິ່ງໄດ້ໂພສຕ໌ຂໍ້ຄວາມຕາມຫາແມ່ ໃນເວັບໄຊຕຳຫລວດ ເນື່ອງໃນວັນແມ່ຂອງຈີນ ເມື່ອຕົ້ນເດືອນທີ່ຜ່ານມາ ແລະ ຫລັງຈາກນັ້ນບໍ່ພໍ 10 ມື້ ທາງຕຳຫລວດ ກໍໄດ້ທຳການສືບຫາແມ່ຂອງເຂົາຈົນສຳເລັດ ແລ້ວໄດ້ຈັດໃຫ້ແມ່ລູກຄູ່ນີ້ ໄດ້ພົບກັນໃນທີ່ສຸດ.