ສຳນັກຂ່າວຕ່າງປະເທດ ລາຍງານໃນວັນທີ 28 ພຶດສະພານີ້ວ່າ ທາງການເຢຍລະມັນ ສົ່ງເຈົ້າໜ້າທີ່ເຂົ້າເກັບກູ້ລະເບີດຍຸກສົງຄາມໂລກຄັ້ງທີ 2 ໃນມື້ວານນີ້ (27 ພຶດສະພາ) ເຊິ່ງຖືກພົບຝັງຢູ່ໃນດິນ ເຂດກໍ່ສ້າງແຫ່ງໜຶ່ງ ໃນເມືອງໂຄໂລນ ທາງພາກຕາເວັນຕົກຂອງປະເທດ ໂດຍເຈົ້າໜ້າທີ່ໄດ້ສັ່ງອົບພະຍົບປະຊາຊົນ ປະມານ 20,000 ຄົນ ອອກຈາກພື້ນທີ່ອ້ອມຮອບ ເພື່ອຄວາມປອດໄພ, ຫລັງຈາກນັ້ນ ເຈົ້າໜ້າທີ່ເກັບກູ້ລະເບີດ ຈິ່ງໄດ້ເຂົ້າປົດກະນວນສຳເລັດດ້ວຍຄວາມປອດໄພ.
ລະເບີດລູກດັ່ງກ່າວນີ້ ແມ່ນມີນ້ຳໜັກ 1 ໂຕນ ຜະລິດຢູ່ສະຫະລັດອາເມຣິກາ ທີ່ຖືກນຳມາຖິ້ມໂດຍຝ່າຍສຳພັນທະມິດ ໃສ່ກອງທັບຂອງນາຊີເຢຍລະມັນ ໃນຍຸກສົງຄາມໂລກຄັ້ງທີ 2 ໂດຍເຖິງແມ່ນຈະປິດສາກໄປແລ້ວດົນເຖິງ 70 ປີ ແຕ່ວ່າຢູ່ໃນບາງພື້ນທີ່ຂອງປະເທດເຢຍລະມັນ ກໍຍັງພົບມີລູກລະເບີດທີ່ຍັງບໍ່ທັນແຕກ ຕົກຄ້າງຢູ່ໃນດິນ ແລະ ຜູ້ທີ່ຄົ້ນພົບສ່ວນໃຫຍ່ ກໍແມ່ນກຳມະກອນກໍ່ສ້າງ.
