ອິນເດຍປະເຊີນສະພາບອາກາດຮ້ອນຈັດ ຈາກອິດທິພົນຄື່ນຄວາມຮ້ອນເຂົ້າປົກຄຸມ ເຮັດໃຫ້ມີປະຊາຊົນເສຍຊີວິດ ແລ້ວຫລາຍກ່ວາ 700 ຄົນ.
ສຳນັກຂ່າວຕ່າງປະເທດ ລາຍງານໃນວັນທີ 26 ພຶດສະພານີ້ວ່າ ປະຊາຊົນຊາວອິນເດຍ ຕ້ອງໄດ້ປະເຊີນກັບສະພາບອາກາດຮ້ອນຈັດ 48 ອົງສາເຊ ເຮັດໃຫ້ມີຄົນເສຍຊີວິດແລ້ວ 700 ກ່ວາຄົນ ໂດຍສຳນັກອຸຕຸນິຍົມວິທະຍາຂອງອິນເດຍ ປະກາດເຕືອນເປັນພື້ນທີ່ສີແດງໃນຫລາຍລັດ ຢູ່ທາງພາກຕາເວັນອອກ ແລະ ພາກກາງ ໃນຂະນະທີ່ສະພາວະດັ່ງກ່າວ ຈະຮຸນແຮງຂຶ້ນຢ່າງຕໍ່ເນື່ອງ ໂດຍທາງການອິນເດຍ ໄດ້ແນະນຳໃຫ້ປະຊາຊົນຫລີກລ່ຽງຈາກແສງແດດ ກິນອາຫານທີ່ມີປະໂຫຍດ ແລະ ດື່ມນ້ຳສະອາດ.
ຈາກການເປີດເຜີຍຂອງຄະນະກຳມະການພິເສດ ເພື່ອແກ້ໄຂໄພພິບັດສຸກເສີນແຫ່ງຊາດອິນເດຍ ໄດ້ລະບຸວ່າ ຜູ້ເສຍຊີວິດຈາກອາກາດຮ້ອນ ໂດຍສ່ວນໃຫຍ່ແມ່ນເປັນຄົນທຸກຍາກ, ຂໍທານ ແລະ ຄົນບໍ່ມີເຮືອນຢູ່ ພ້ອມກັນນັ້ນ ກໍມີກຳມະກອນກໍ່ສ້າງອີກຈຳນວນໜຶ່ງ ທີ່ເຮັດວຽກຖືກແສງແດດໂດຍກົງ.