ກອງທັບອິນໂດເນເຊຍ ຈົມເຮືອປະມົງຕ່າງດ້າວ 41 ລຳ ທີ່ລຸກລ້ຳເຂົ້າມາຫາປາໃນນ່ານນ້ຳຂອງຕົນ ເຊິ່ງເປັນການນຳໃຊ້ມາດຕະການທີ່ເດັດຂາດ ຫລັງດຶງລາຍໄດ້ຄືນໃຫ້ຊາວປະມົງອິນໂດເນເຊຍ ແລະ ກະຕຸ້ນເສດຖະກິດຂອງປະເທດ.
ສຳນັກຂ່າວຕ່າງປະເທດ ລາຍງານໃນວັນທີ 22 ພຶດສະພານີ້ວ່າ ກອງທັບເຮືອອິນໂດເນເຊຍ ຮ່ວມກັບກົມປະມົງ ໄດ້ທຳການຈົມເຮືອປະມົງຕ່າງດ້າວ ທີ່ຖືກຍຶດໄວ້ຈາກການເຂົ້າມາເຮັດການປະມົງໃນເຂດນ່ານນ້ຳຂອງປະເທດອິນໂດເນເຊຍ ຈຳນວນທັງໝົດ 41 ລຳ ໂດຍໃນນັ້ນ ມາຈາກຈີນ 1 ລຳ, ທີ່ເຫລືອມີເຮືອຈາກຫວຽດນາມ, ຟິລິບປິນ ແລະ ຈາກປະເທດໄທ ໂດຍທະຫານອິນໂດເນເຊຍ ໄດ້ທຳລາຍດ້ວຍການວາງລະເບີດ ໃຫ້ເກີດມີໄຟລຸກໄໝ້ ແລ້ວປ່ອຍໃຫ້ຈົມລົງໃນທະເລ.
ດ້ານລັດຖະມົນຕີປະມົງອິນໂດເນເຊຍ ໄດ້ໃຫ້ສຳພາດກັບສື່ມວນຊົນວ່າ ຖ້າຫາກບໍ່ເດີນໜ້າທຳລາຍເຮືອປະມົງ ທີ່ພາກັນລຸກລ້ຳເຂົ້າມາໃນນ່ານນ້ຳຂອງປະເທດ ກໍຈະບໍ່ສາມາດເບິ່ງແຍງຄວາມເປັນຢູ່ຂອງຊາວປະມົງອິນໂດເນເຊຍໄດ້.