ອົງ​ການ​ອະ​ນາ​ໄມ​ໂລກ ຫລື WHO ເປີດ​ເຜີຍ​ໃນ​ມື້​ວັນ​ສຸກ​ທີ 20 ພຶດ​ສະ​ພາ​ຜ່ານ​ມາ​ນີ້​ວ່າ ພົບ​ຜູ້​ຕິດ​ເຊື້ອ​ໄວ​ຣັດ​ອີ​ໂບ​ລາ​ລາຍ​ໃໝ່ ເຖິງ 35 ຄົນ​ໃນ​ຮອບ 7 ມື້ ໃນ​ປະ​ເທດ​ກີ​ນີ ແລະ ເຊຍ​ຣາ​ລີ​ໂອນ ເຊິ່ງ​ຖື​ເປັນ​ການ​ພົບ​ຜູ້​ຕິດ​ເຊື້ອ​ໃໝ່ ທີ່​ສູງ​ຂຶ້ນ​ຈາກ​ອາ​ທິດ​ກ່ອນ​ໜ້າ ທີ່​ມີ​ຜູ້​ຕິດ​ເຊື້ອ​ພຽງ​ແຕ່ 9 ຄົນ.

ໃນ​ຈຳ​ນວນ​ຜູ້​ຕິດ​ເຊື້ອ​ໄວ​ຣັດ​ອີ​ໂບ​ລາ​ລາຍ​ໃໝ່ 35 ຄົນ​ນີ້ ແມ່ນ​ເປັນ​ຄົນ​ກີ​ນີ ສູງ​ເຖິງ 27 ຄົນ ນອກ​ນັ້ນ​ແມ່ນ​ເປັນ​ຊາວ​ເຊຍ​ຣາ​ລີ​ໂອນ, ຮອດ​ປັດ​ຈຸ​ບັນ ມີ​ຍອດ​ລວມ​ຂອງ​ຜູ້​ຕິດ​ເຊື້ອ​ທັງ​ໝົດ ພາຍ​ໃນ​ພາກ​ພື້ນ​ອາ​ຟ​ຣິ​ກາ​ຕາ​ເວັນ​ຕົກ ເພີ່ມ​ເປັນ 26,933 ຄົນ ໃນ​ນັ້ນ​ແມ່ນ​ເສຍ​ຊີ​ວິດ​ລ່າ​ສຸ​ດ 11,120 ຄົນ.

ລາຍ​ງານ​ຂ່າວ​ຍັງ​ລະ​ບຸ​ວ່າ ພົບ​ເຈົ້າ​ໜ້າ​ທີ່​ສາ​ທາ​ລະ​ນະ​ສຸກ ຊາວ​ເຊຍ​ຣາ​ລີ​ໂອນຄົນ​ໜຶ່ງ ຕິດ​ເຊື້ອ​ອີ​ໂບ​ລາ ໃນ​ຂະ​ນະ​ໃຫ້​ການ​ປິ່ນ​ປົວ​ໃກ້​ຊິດ​ກັບ​ຄົນ​ເຈັບທີ່​ຕິດ​ເຊື້ອ ໃນ​ນະ​ຄອນ​ຫລວງ​ຟ​ຣີ​ທາວ ໂດຍ WHO ໄດ້​ລະ​ບຸ​ວ່າ ນັບ​ຕັ້ງ​ແຕ່​ເກີດ​ການ​ລະ​ບາດ​ໃນ​ພາກ​ພື້ນ​ອາ​ຟ​ຣິ​ກາ​ຕາ​ເວັນ​ຕົກ​ເປັນ​ຕົ້ນ​ມາ ແມ່ນ​ມີ​ເຈົ້າ​ໜ້າ​ທີ່​ສາ​ທາ​ລະ​ນະ​ສຸກ ແລະ ບຸກ​ຄະ​ລາ​ກອນ​ການ​ແພດ ຕິດ​ເຊື້ອ​ໄປ​ແລ້ວ 869 ຄົນ ໃນ​ນັ້ນ​ເສຍ​ຊີ​ວິດ 507 ຄົນ.