ກົມມາດຕະຖານ ແລະ ວັດແທກ ກະຊວງວິທະຍາສາດ ແລະ ເຕັກໂນໂລຊີ ຮ່ວມກັບຊ່ຽວຊານໂຄງການສ້າງຄວາມເຂັ້ມແຂງທາງດ້ານໂຄງລ່າງຄຸນະພາບ ແຫ່ງຊາດ (EIF TIER II) ຈັດເຝິກອົບຮົມການສ້າງຄວາມເຂົ້າໃຈມາດຕະຖານສາກົນ ISO/IEC 17065 ກ່ຽວກັບວຽກງານການຢັ້ງຢືນຜະລິດຕະພັນ ຂະບວນການ ແລະ ການບໍລິການ ໂດຍໄດ້ຮັບການສະໜັບສະໜູນຈາກໂຄງການສ້າງຄວາມເຂັ້ມແຂງທາງດ້ານໂຄງ ລ່າງຄຸນະພາບແຫ່ງຊາດ ຂຶ້ນວັນທີ 18 ພຶດສະພາ 2015 ທີ່ໂຮງແຮມລາວ ພລາຊາ ນະຄອນຫຼວງວຽງຈັນ ເປັນປະທານຂອງທ່ານ ບຸນປອນ ບົວແພງ ຮັກສາການຫົວໜ້າກົມມາດຕະຖານ ແລະ ວັດແທກ ມີນັກເຝິກອົບຮົມ 30 ທ່ານ ທີ່ມາຈາກກົມອາຫານ ແລະ ຢາ ສູນວິໄຈອາຫານ ແລະ ຢາ ຫ້ອງທົດລອງຄະນະກຳມະການສຳຫຼວດອອກແບບ ແລະ ວິໄຈວັດສະດຸ ຈາກກະຊວງໂຍທາທິການ ແລະ ຂົນສົ່ງ ມະຫາວິທະຍາໄລແຫ່ງຊາດ ຄະນະກຳມະການແຫ່ງຊາດ ດ້ານການຢັ້ງຢືນ ແລະ ພະນັກງານພາຍໃນກົມດັ່ງກ່າວເຂົ້າຮ່ວມ.
ການຈັດເຝິກອົບຮົມຄັ້ງນີ້ ແມ່ນເພື່ອສືບຕໍ່ວຽກງານການຢັ້ງຢືນຜະລິດຕະພັນ ຂະບວນການ ແລະ ການບໍລິການສິນຄ້າ ທີ່ຕິດພັນກັບວຽກງານຄຸນະພາບ ແລະ ທັງເປັນການຍົກລະດັບຄວາມຮູ້ ຄວາມເຂົ້າໃຈກ່ຽວກັບຄວາມສຳຄັນ ແລະ ການນຳໃຊ້ມາດຕະຖານສາກົນ ໂດຍສະເພາະບັນດາປະເທດທີ່ກຳລັງພັດທະນາ ວຽກງານການຢັ້ງຢືນຜະລິດຕະພັນ ແລະ ສິນຄ້າ ເປັນວຽກງານໜຶ່ງທີ່ສຳຄັນ ແລະ ມີຄວາມຈຳເປັນທີ່ສຸດສຳລັບໂຄງລ່າງດ້ານຄຸນະພາບແຫ່ງຊາດ ສະນັ້ນ ທາງກົມມາດຕະຖານ ແລະ ວັດແທກ ຈຶ່ງໄດ້ຈັດເຝິກອົບຮົມນີ້ຂຶ້ນ ເພື່ອເປັນການສ້າງຄວາມເຂົ້າໃຈ ແລະ ຄວາມອາດສາມາດໃຫ້ແກ່ພະນັກງານທີ່ກ່ຽວຂ້ອງ.
ຂັ້ນຕອນການຢັ້ງຢືນຕາມມາດຕະຖານ ISO/IEC 17065 ເພື່ອກຽມພ້ອມການສ້າງໂຄງລ່າງພື້ນຖານດ້ານຄຸນະພາບແຫ່ງຊາດຂອງ ສປປ ລາວ ໃຫ້ມີຄວາມເຂັ້ມແຂງໃນການກ້າວເຂົ້າເປັນປະຊາຄົມເສດຖະກິດອາຊຽນ (AEC) ໃນທ້າຍປີ 2015 ນອກຈາກນີ້ຍັງເປັນສິ່ງອຳນວຍຄວາມສະດວກໃຫ້ແກ່ວຽກງານການຄ້າ ວຽກງານການປົກປ້ອງຜູ້ຊົມໃຊ້ ເພື່ອເລັ່ງໃສ່ຄວາມປອດໄພ ທັງເປັນການສະໜັບສະໜູນການຄວບຄຸມຄຸນະພາບຜະລິດຕະພັນ ແລະ ສິນຄ້າທີ່ຜະລິດ ແລະ ຄວບຄຸມຄຸນະພາບການຜະລິດຕະພັນ.
ແຫລ່ງຂ່າວ: ວຽງຈັນໃໝ່