ເກີດອຸບັດເຫດລົດໂດຍສານສອງແຖວເສຍຫລັກແລ່ນຕຳເອົາລົດສີບລໍ້ ແລະ ລົດກວດດິນທີ່ຈອດໄວ້ຂ້າງທາງ ພ້ອມຕຳເອົາລົດສາມລໍ້ຢ່າງແຮງທ່າມກາງສຽງຮ້ອງໂຮຕົກໃຈຂອງຜູ້ເຫັນເຫດການເຮັດໃຫ້ມີຜູ້ໄດ້ຮັບບາດເຈັບສາຫັດຫລາຍຄົນ ແຕ່ໂຊກດີບໍ່ມີຜູ້ໃດເສຍຊີວິດ.
ອີງຕາມການລາຍງານຂອງທ່ານ ກົງພະລີ ແກ້ວມໍລະຈັກ ຫົວຫນ້າກອງແກ້ໄຂຄະດີອຸບັດເຫດຂອງພະແນກຈະລາຈອນແຂວງຈຳປາສັກ, ຕໍ່ນັກຂ່າວຫນັງສືພິມເສດຖະກິດ-ສັງຄົມໃຫ້ຮູ້ວ່າ: ເວລາປະມານ 8.30 ໂມງ, ຂອງວັນທີ 6 ມີນາ 2013, ໄດ້ເກີດມີລົດໂດຍສານສອງແຖວທະບຽນ 0353 ຈຳປາສັກ, ຜູ້ຂັບຄືທ້າວ ອຸດອນ ອາຍຸ 50 ປີ ສັນຊາດລາວ, ອາຊີບຂັບລົດບ້ານຫນອງໄຮທ່າ ເມືອງໂພນທອງ, ຂັບລົດມາແຕ່ເວີນໄຊຫາປາກເຊ, ພໍແຕ່ແລ່ນລົດມາຮອດສີ່ແຍກຕະຫລາດປາກເຊ ຕໍ່ຫນ້າທະນາຄານຮ່າໂນ້ຍໄດ້ມີລົດວີໂກ້ແລ່ນຕັດຫນ້າເຮັດໃຫ້ລົດສອງແຖວຄັນດັ່ງກ່າວເສຍຫລັກເຈືອກໄປຕຳເອົາລົດສິບລໍ້ທີ່ຈອດໄວ້ຂ້າງທາງເບື້ອງຂວາຊັດໃສ່ລົດກວດດິນທີ່ຈອດໄວ້ຂ້າງ ຫນ້າແລ້ວເສຍຫລັກໄປຕຳເອົາລົດສາມລໍ້ອີກຄັນທີ່ກຳລັງແລ່ນມາດ້ວຍຄວາມໄວ, ເຮັດໃຫ້ຜູ້ຂັບລົດສາມລໍ້ໄດ້ຮັບບາດເຈັບສາຫັດ ແລະ ຜູ້ໂດຍສານໄດ້ຮັບບາດເຈັບເລັກນ້ອຍ.
ສ່ວນລົດໂດຍສານຄັນດັ່ງກ່າວແມ່ນໄດ້ຂົນສົ່ງຜູ້ໂດຍສານມີຈຳນວນທັງຫມົດ 18 ຄົນ ລວມທັງຜູ້ຂັບ, ໃນນັ້ນ ມີຜູ້ໄດ້ຮັບບາດເຈັບເລັກນ້ອຍ 3 ຄົນ, ສົມຄວນ 3 ຄົນ ແລະ ບາດເຈັບສາຫັດ 3 ຄົນ, ເຊິ່ງຜູ້ທີ່ຢູ່ໃນເຫດການໄດ້ນຳສົ່ງໂຮງຫມໍ, ປະຈຸບັນແມ່ນໄດ້ຮັບການຮັກສາຕົວ ແລະ ບໍ່ມີຜູ້ໃດເສຍຊີວິດແຕ່ຢ່າງໃດ, ເຊິ່ງການເກີດອຸປະຕິເຫດດັ່ງກ່າວນອກຈາກຈະເຮັດໃຫ້ມີຜູ້ທີ່ໄດ້ຮັບບາດເຈັບແລ້ວ ຍັງໄດ້ສ້າງຄວາມເສຍຫາຍເປັນຕາມການປະເມີນເບື້ອງຕົ້ນ 50 ລ້ານກີບ.
ສ່ວນສາເຫດຂອງການເກີດອຸບັດເຫດດັ່ງກ່າວແມ່ນເກີດ ຍ້ອນຄວາມຂາດສະຕິລະວັງຕົວ, ຄວາມເປັນເຈົ້າການໃນການຂັບຂີ່ລວມໄປເຖິງເຕັກນິກຂອງຍານພາຫານະ.
ທີ່ມາhttp://www.ecom.org.la