ທາງການຊາອຸດິອາຣະເບຍ ປະກາດໃນມື້ວັນຈັນທີ 18 ພຶດສະພາຜ່ານມານີ້ ເພື່ອຮັບສະມັກ ເພັດຊະຄາດ ຈຳນວນ 8 ຕຳແໜ່ງ ຫລັງຈຳນວນຜູ້ຖືກຕັດສິນປະຫານຊີວິດເພີ່ມສູງຂຶ້ນ ເຮັດໃຫ້ເພັດຊະຄາດທີ່ມີຢູ່ບໍ່ພຽງພໍ.
ສຳນັກຂ່າວຕ່າງປະເທດ ລາຍງານໃນວັນທີ 19 ພຶດສະພານີ້ວ່າ ທາງການຊາອຸດິອາຣະເບຍ ໄດ້ເປີດຮັບຂ້າລາຊະການໃໝ່ ໃນຕຳແນ່ງເພັດຊະຄາດ ເພີ່ມອີກ 8 ຕຳແໜ່ງ ເຊິ່ງມີຂຶ້ນທ່າມກາງຫາງສຽງໂຈມຕີວິພາກວິຈານ ຈາກນັກເຄື່ອນໄຫວດ້ານສິດທິມະນຸດໃນທົ່ວໂລກ ທີ່ໄດ້ລະບຸວ່າ ຊາອຸດິອາຣະເບຍ ເປັນປະເທດທີ່ມີການປະຫານຊີວິດນັກໂທດສູງທີ່ສຸດປະເທດໜຶ່ງຢູ່ໃນໂລກ.
ລ່າສຸດໃນມື້ວັນທີ 17 ພຶດສະພາຜ່ານມານີ້ ທາງການຊາອຸດິອາຣະເບຍ ກໍໄດ້ປະຫານຊີວິດນັກໂທດຊາຍຄົນໜຶ່ງ ດ້ວຍການຕັດຄໍ ເຊິ່ງຖືເປັນນັກໂທດຄົນທີ 85 ແລ້ວທີ່ຖືກປະຫານພາຍໃນປີ 2015 ນີ້ ເຊິ່ງຄາດວ່າອາດມີທ່າອ່ຽງສູງຂຶ້ນ ກາຍສະຖິຕິປີກາຍ ທີ່ມີນັກໂທດຖືກປະຫານລວມທັງໝົດ 88 ຄົນ.
ທັງນີ້ ຜູ້ທີ່ຖືກໂທດຕັດສິນປະຫານຊີວິດໂດຍສ່ວນໃຫຍ່ ໃນລາຊະອານາຈັກຊາອຸດິອາຣະເບຍ ແມ່ນເປັນຜູ້ທີ່ມີຄວາມຜິດຖານຄາດຕະກຳ ແລະ ຄວາມຜິດກ່ຽວກັບຢາເສບຕິດ ເຊິ່ງເຄິ່ງໜຶ່ງຂອງນັກໂທດປະຫານ ແມ່ນເປັນພົນລະເມືອງຂອງຊາອຸດິອາຣະເບຍເອງ.