ເກີດເຫດດິນຖະຫລົ່ມໃນພາກຕາເວັນຕົກສຽງເໜືອຂອງປະເທດໂກລົມບີ ເນື່ອງຈາກຝົນຕົກໜັກ ເຮັດໃຫ້ມີຜູ້ເສຍຊີວິດແລ້ວ ຢ່າງໜ້ອຍ 48 ຄົນ.
ສຳນັກຂ່າວຕ່າງປະເທດ ລາຍງານໃນວັນທີ 19 ພຶດສະພານີ້ວ່າ ເກີດເຫດດິນຖະຫລົ່ມໃນພື້ນທີ່ລັດແອນຕິໂອເກຍ ທາງພາກຕາເວັນຕົກສຽງເໜືອຂອງປະເທດໂກລົມບີ ໃນຕອນເຊົ້າຂອງວັນຈັນທີ 18 ພຶດສະພາຜ່ານມານີ້ ເຮັດໃຫ້ມີຜູ້ເສຍຊີວິດແລ້ວ ຢ່າງໜ້ອຍ 48 ຄົນ ໂດຍສາເຫດແມ່ນເກີດມາຈາກຝົນທີ່ຕົກລົງມາຢ່າງໜັກ ສົ່ງຜົນເຮັດໃຫ້ນ້ຳໃນແມ່ນ້ຳລິໂບເຣຍນາ ໃນເມືອງຊັນກາ ລົ້ນຝັ່ງໄຫລເຂົ້າຖ້ວມຕະລິ່ງ ເຮັດໃຫ້ເກີດມີດິນຖະຫລົ່ມ.
ເຈົ້າໜ້າທີ່ໂກລົມບີ ໄດ້ສົ່ງທີມສຸກເສີນທຸກໜ່ວຍອອກໄປຊ່ວຍເຫລືອຜູ້ປະສົບໄພ ໂດຍກອງທັບອາກາດໂກລົມບີໄດ້ເປີດເຜີຍວ່າ ໄດ້ສົ່ງເຮືອບິນເຮລິຄັອບເຕີ້ ໄປພື້ນທີ່ດັ່ງກ່າວແລ້ວ ໂດຍມີທະຫານຫລາຍກ່ວາ 160 ຄົນ ເຂົ້າຮ່ວມໃນການແກ້ໄຂສະຖານະການສຸກເສີນ.