ວັນທີ 18 ພຶດສະພາ 2015 ທີ່ໂຮງໝໍເມືອງໂພນໂຮງ ແຂວງວຽງຈັນ ໄດ້ຈັດມີພິທີວາງສີລາເລີກໂຄງການກໍ່ສ້າງອາຄານສູນບຳບັດ ແລະ ຟື້ນຟູຜູ້ຕິດຢາເສບຕິດ ແລະ ການປັບປຸງອາຄານຄົນເຈັບພາຍນອກເປັນສູນຮອງຮັບຜູ້ໄດ້ຮັບອຸບັດຕິ ເຫດ ແລະ ສົ່ງຕໍ່ ໂດຍທຶນຊ່ວຍເຫຼືອຈາກລັດຖະບານໄທ ພາຍໃຕ້ຂອບການຮ່ວມມືດ້ານວິຊາການ ລາວ-ໄທ ເຊິ່ງປະກອບມີການກໍ່ສ້າງອາຄານ ການພັດທະນາບຸກຄະລາກອນ ແລະ ການສະໜອງອຸປະກອນທາງການແພດລວມມູນຄ່າທັງໝົດ ຈຳນວນ 50 ລ້ານບາດ ຫຼື ປະມານ 12,5 ຕື້ກີບ ຕາງໜ້າລັດຖະບານລາວ ແມ່ນທ່ານ ທອງລຸນ ສີສຸລິດ ຮອງນາຍົກລັດຖະມົນຕີ ລັດຖະມົນຕີວ່າການກະຊວງການຕ່າງປະເທດ ແລະ ຕາງໜ້າລັດຖະບານໄທ ແມ່ນທ່ານພົນເອກ ທະນະສັກ ປະຕິມາປຣະກອນ ຮອງນາຍົກລັດຖະມົນຕີລັດຖະມົນຕີວ່າການກະຊວງການຕ່າງປະເທດ ເປັນປະທານໃນພິທີ ນອກຈາກນັ້ນ ຍັງມີທ່ານລັດຖະມົນຕີວ່າການກະຊວງສາທາລະນະສຸກ ທ່ານເຈົ້າແຂວງວຽງຈັນ ມີທ່ານທູດລາວ ປະຈຳປະເທດໄທ ທ່ານທູດໄທ ປະຈຳລາວ ແລະ ພະນັກງານຈາກກະຊວງ ຂະແໜງການທີ່ກ່ຽວຂ້ອງຂອງ ສປປ ລາວ ແລະ ຣາຊະອານາຈັກໄທ ເຂົ້າຮ່ວມ.
ໂຄງການດັ່ງກ່າວແມ່ນນອນຢູ່ໃນແຜນພັດທະນາຂະແໜງສາທາລະນະສຸກຂອງ ລັດຖະບານ ສປປ ລາວ ໂດຍມີຈຸດປະສົງເພື່ອໃຫ້ການບໍລິການປິ່ນປົວປະຊາຊົນທີ່ໄດ້ຮັບ ເຄາະຮ້າຍຈາກຢາເສບຕິດໃນແຂວງວຽງຈັນ ກໍ່ຄືບັນດາແຂວງໃກ້ຄຽງ ການສ້າງອາຄານ ສູນບຳບັດດັ່ງກ່າວ ຈະປະກອບສ່ວນອັນໃຫຍ່ຫຼວງໃຫ້ແກ່ການພັດທະນາຂະແໜງສາທາລະນະສຸກ ໂດຍສະເພາະແມ່ນຈະເຮັດໃຫ້ການບໍລິການສາທາລະນະສຸກມີຄວາມສະດວກ ແລະ ຄ່ອງຕົວຫຼາຍຂຶ້ນກວ່າເກົ່າ ອັນຈະເປັນການສ້າງເງື່ອນໄຂທີ່ດີໃຫ້ແກ່ການຈັດຕັ້ງປະຕິບັດເປົ້າ ໝາຍສະຫັດສະວັດດ້ານການພັດທະນາ ນອກຈາກເຂົ້າຮ່ວມພິທີວາງສີລາເລີກແລ້ວ ທ່ານຮອງນາຍົກລັດຖະມົນຕີ ລັດຖະມົນຕີວ່າການກະຊວງການຕ່າງປະເທດໄທ ຍັງໄດ້ເດີນທາງໄປຢ້ຽມຢາມໂຮງຮຽນເຕັກນິກ ແຂວງວຽງຈັນ ເຊິ່ງເປັນໂຮງຮຽນທີ່ມີໂຄງການຮ່ວມມືທີ່ນອນໃນຂອບການຮ່ວມມືດ້ານ ວິຊາການ ລາວ-ໄທ ເຊັ່ນດຽວກັນ.
ທ່ານ ພົນເອກ ທະນະສັກ ປະຕິມາປຣະກອນ ໄດ້ສະແດງຄວາມຂອບໃຈຢ່າງຈິງໃຈຕໍ່ລັດຖະບານລາວ ອຳນາດການປົກຄອງ ແລະ ປະຊາຊົນຊາວແຂວງວຽງຈັນ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ດ້ວຍໄມຕີຈິດມິດຕະພາບ ແລະ ອຳນວຍຄວາມສະດວກທຸກດ້ານ ເຮັດໃຫ້ການຢ້ຽມຢາມ ແລະ ພິທີວາງສີລາເລີກຄັ້ງນີ້ ປະສົບຜົນສຳເລັດຢ່າງຈົບງາມ ແລະ ໃນຕອນແລງຂອງວັນດຽວກັນ ທ່ານ ທອງລຸນ ສີສຸລິດ ຍັງໄດ້ເປັນເຈົ້າພາບຈັດງານລ້ຽງອາຫານຄ່ຳ ເພື່ອເປັນກຽດໃຫ້ແກ່ທ່ານ ທະນະສັກ ປະຕິມາປຣະກອນ ທີ່ໂຮງແຮມລາວພລາຊາ ຫຼັງຈາກນັ້ນ ຄະນະຜູ້ແທນໄທ ໄດ້ເດີນທາງກັບປະເທດ ດ້ວຍຄວາມສະຫວັດດີພາບ.
ແຫລ່ງຂ່າວ: ວຽງຈັນໃໝ່