ສຳນັກຂ່າວຕ່າງປະເທດ ລາຍງານໃນວັນທີ 18 ພຶດສະພານີ້ວ່າ ເກີດເຫດອຸທາຫອນທີ່ໜ້າສະຫລົດໃຈຂຶ້ນ ເມື່ອສາວໄວລຸ້ນຊາວໂຣມານີ ຕ້ອງເຖິງແກ່ຊີວິດ ຫລັງຈາກນອນຍົກຂາຖ່າຍເຊວຟີ່ຢູ່ເທິງຫລັງຄາລົດໄຟ ເຮັດໃຫ້ໄຟຊ໊ອດຕາຍ.
ລາຍງານຂ່າວໄດ້ລະບຸວ່າ ຜູ້ເຄາະຮ້າຍຊື່ ນາງ ແອນນາ ເອີຊູ ອາຍຸ 18 ປີ ແລະ ໝູ່ຂອງນາງ ໄດ້ເດີນທາງດ້ວຍລົດໄຟໃນເມືອງໄອຊີ ແຕ່ນາງເປັນຄົນທີ່ມັກຖ່າຍຮູບຕົນເອງ ຫລື ເຊວຟີ່ຫລາຍ ແລະ ຕ້ອງການທີ່ຈະຖ່າຍຮູບເຊວຟີ່ແບບແປກໃໝ່ ຈິ່ງໄດ້ຂຶ້ນໄປນອນເທິງຫລັງຄາລົດໄຟ ແລະ ໄດ້ຍົກຂາເບື້ອງໜຶ່ງຂຶ້ນເທິງຟ້າ ກ່ອນທີ່ຂາຈະໄປພາດໃສ່ສາຍໄຟຟ້າແຮງສູງ ເຮັດໃຫ້ໄຟຟ້າຊ໊ອດ ແລະ ໄດ້ຮັບບາດເຈັບສາຫັດ ກ່ອນທີ່ຈະຖືກນຳຮ່າງຂຶ້ນເຮືອບິນ ເພື່ອໄປໂຮງໝໍ ໂດຍນາງເອງຢູ່ໃນສະພາບຖືກໄຟຟ້າໄໝ້ຮ່າງກາຍເຖິງ 50% ແລະ ເສຍຊີວິດລົງໃນເວລາຕໍ່ມາ.