ແກ໊ງ​ລົດ​ຈັກ Big Bike ​ຄູ່​ຂັດ​ແຍ່ງ 3 ແກ໊ງ ຈົກ​ປືນ​ຍິງດວນ​ກັນ​ນອກ​ຮ້ານ​ອາ​ຫານ ຢູ່​ລັດ​ເທັກ​ຊັດ ສະ​ຫະ​ລັດ​ອາ​ເມ​ຣິ​ກາ ຕາຍ​ຢ່າງ​ໜ້ອຍ 9 ຄົນ ແລະ ບາດ​ເຈັບ​ອີກ 18 ຄົນ.

ສຳ​ນັກ​ຂ່າວ​ຕ່າງ​ປະ​ເທດ ລາຍ​ງານ​ເຫດ​ການ​ລະ​ທຶກ​ດັ່ງ​ກ່າວ ໂດຍ​ມີ​ແກ໊ງ​ລົດ​ຈັກ Big Bike ເຊິ່ງ​ຂັດ​ແຍ່ງ​ກັນ​ມາ​ກ່ອນ 3 ແກ໊ງ ໂຄ​ຈອນ​ມາ​ພົບ​ກັນ ຈົນ​ເປັນ​ເຫດ​ເຮັດ​ໃຫ້​ມີ​ການ​ຍິງ​ກັນ​ແບບ​ຫູ​ດັບ​ຕັບ​ໄໝ້ ຢູ່​ລານ​ຈອດ​ລົດ​ນອກ​ຮ້ານ​ອາ​ຫານ “ທະ​ວິນ ພີກ ສະ​ປອດ ບາ​ຣ໌ ແອນ ກ​ຣິວ” ໃນ​ເມືອງວາ​ໂກ ລັດ​ເທັກ​ຊັດ ສະ​ຫະ​ລັດ​ອາ​ເມ​ຣິ​ກາ ໃນ​ຕອນ​ບ່າຍ​ຂອງ​ມື້​ວັນ​ອາ​ທິດ​ທີ 17 ພຶດ​ສະ​ພາ​ຜ່ານ​ມາ​ນີ້ ເປັນ​ເຫດ​ເຮັດ​ໃຫ້​ມີ​ຜູ້​ເສຍ​ຊີ​ວິດ ຖືກ​ຍິງ​ຕາຍ 9 ຄົນ ແລະ ມີ​ຜູ້​ໄດ້​ຮັບ​ບາດ​ເຈັບ​ອີກ 18 ຄົນ.

ຈາກ​ການ​ເປີດ​ເຜີຍ​ຂອງ​ເຈົ້າ​ໜ້າ​ທີ່​ຕຳ​ຫລວດ​ເມືອງວາ​ໂກ ລະ​ບຸ​ວ່າ ສະ​ມາ​ຊິກ​ແກ໊ງ​ລົດ​ຈັກ​ດັ່ງ​ກ່າວ​ນີ້ ໄດ້​ເກີດ​ມີ​ການ​ຜິດ​ຖຽງ​ກັນ​ໃນ​ຮ້ານ​ອາ​ຫານຢ່າງ​ຮຸນ​ແຮງ ໂດຍ​ໃຊ້​ມີດ ແລະ ໂສ້​ເປັນ​ອາ​ວຸດ​ຕີ​ກັນດຸ​ເດືອດ ແລ້ວ​ກ້າວ​ໄປ​ເຖິງ​ມີ​ການ​ຈົກ​ປືນ​ອອກ​ມາ​ຍິງດວນ​ກັນ​ສະ​ໜັ່ນ​ຫວັ່ນ​ໄຫວ ຢູ່​ດ້ານນອກ​ຂອງ​ຮ້ານ​ອາ​ຫານ ຈົນ​ເຮັດ​ໃຫ້​ມີ​ຜູ້​ເສຍ​ຊີວດ ແລະ ບາດ​ເຈັບ​ດັ່ງ​ກ່າວ.

ທັງ​ນີ້ ເຫດ​ການ​ດັ່ງ​ກ່າວ ແມ່ນ​ມີ​ຜູ້​ບໍ​ລິ​ສຸດ​ໄດ້​ຮັບ​ລູກ​ຫລົງຈົນ​ເສຍ​ຊີ​ວິດ ແລະ ບາດ​ເຈັບ​ອີກ​ດ້ວຍ ເຊິ່ງ​ຈຳ​ນວນ​ສະ​ມາ​ຊິກ​ແກ໊ງ​ດັ່ງ​ກ່າວ​ທີ່​ເຫລືອ ແມ່ນ​ໄດ້​ຖືກ​ເຈົ້າ​ໜ້າ​ທີ່​ຕຳ​ຫລວດ​ຈັບ​ກຸມ ເພື່ອ​ດຳ​ເນີນ​ຄະ​ດີ​ຕໍ່​ໄປ.