ສຳນັກຂ່າວຕ່າງປະເທດ ລາຍງານໃນວັນທີ 1ຼ5 ພຶດສະພານີ້ວ່າ ທ່ານນາຍົກລັດຖະມົນຕີ ຫລີ່ ເຄີ່ສຽງ ຂອງຈີນ ຈະເດີນທາງຢ້ຽມຢາມປະເທດບຣາຊິນຢ່າງເປັນທາງການໃນອາທິດໜ້ານີ້ ເຊິ່ງຈະມີການລົງນາມຄວາມຮ່ວມມືການລົງທຶນລະຫວ່າງສອງຝ່າຍ ໂດຍຈີນຈະທຸ້ມເງິນລົງທຶນເຖິງ 50 ຕື້ໂດລາ ຜ່ານຕົວແທນສະຖາບັນການທະນາຄານ ທັງຂອງຈີນ ແລະ ບຣາຊິນ.
ຈຳນວນເງິນດັ່ງກ່າວນີ້ ແມ່ນຈະນຳໄປລົງທຶນສ້າງລະບົບລາງລົດໄຟ ເຊື່ອມຈາກຊາຍຝັ່ງມະຫາສະໝຸດປາຊີຟິກ ໄປຈົນຮອດອີກຊາຍຝັ່ງຟາກມະຫາສະໝຸດແອັດແລນຕິກຂອງບຣາຊິນ, ນອກນັ້ນ ຍັງຈະນຳໄປກໍ່ຕັ້ງບໍລິສັດຮ່ວມທຶນລະຫວ່າງສອງປະເທດ ເພື່ອຜະລິດເຫລັກກ້າ ເນື່ອງຈາກປັດຈຸບັນປະເທດບຣາຊິນ ຖືເປັນປະເທດທີ່ສົ່ງອອກແຮ່ເຫລັກໄປຍັງຈີນເປັນຈຳນວນຫລວງຫລາຍ, ພ້ອມກັນນັ້ນ ຍັງຈະຖືກນຳໄປລົງທຶນຜະລິດຊິ້ນສ່ວນລົດ, ອຸດສາຫະກຳພະລັງງານ, ສ້າງທ່າເຮືອ ແລະ ການຜະລິດໄຟຟ້າພະລັງງານນ້ຳອີກດ້ວຍ.
ທັງນີ້ ໃນເດືອນກໍລະກົດທີ່ຜ່ານມາ ປະທານາທິບໍດີ ສີ ຈິ້ນຜິງ ໄດ້ປະກາດເອົາໄວ້ວ່າ ຈະເອົາເງິນ 250 ຕື້ໂດລາ ເພື່ອລົງທຶນໃນບັນດາປະເທດແຖບອາເມຣິກາລາຕິນ ພາຍໃນໄລຍະເວລາ 10 ປີນີ້.